I nderuar lexues! Mjeshtër quhej zejtari i përgatitur nga ana profesionale, dhe sipas sistemit të esnafeve, i shpallur i aftë të gëzonte të drejtën për të pasur punishten e vet dhe për të pajtuar kallfë, çirakë e punëtorë mëditës. Merrte pjesë në mbledhjet e esnafit, në ceremonitë e dhënies së testireve (diplomave). Pozita shoqërore e mjeshtrit ishte e dyfishtë. Nga njëra anë ai shfrytëzonte krahë të tjera të punës, nga ana tjetër, vetë shfrytëzohej nga hierarkia feudale, sepse duhet t’i nënshtrohej një vargu detyrimesh shtetërore, korporative, shoqërore dhe fetare. Mjeshtri duhet të paguante çdo vit taksën përkatëse të anëtarësisë në esnaf, t’u bindej rregullave të hekurta që lidheshin me organizimin e esnafeve dhe disiplinonin prodhimin apo shitjen e mallrave.