Lacat bllokojnë autostradën

Si ditë fundjave dhe me trafik të rënduar, mendohet se policia duhet të jetë shumë më tepër e angazhuar për të vënë rregull në rrugë. Duke ecur dje nga Durrësi në Tiranë na ra në sy një fenomen që të bënte përshtypje. Përveç se nuk pamë asnjë polic, edhe pse trafiku ishte shumë i ngarkuar, u shastisëm kur pamë njerëz në mes të autostradës që dilnin nga makina dhe bllokonin rrugën duke luajtur me njëri-tjetrin. Nën petkun e atyre që quhen laca, askush nuk merret guximin që t’u kërkonte lirimin e rrugës. Pasi bënin disa metra, ndalonin sërish dhe njerëzit që s’kishin lidhje me ta duhej të prisnin vargun dhe sa t’u tekej lacave me makina të shtrenjta që të hapnin rrugën. Policia me sa dukej ishte me pushime, por e mira do ishte që të mos iknin të gjithë në një ditë, se shteti duhet të funksionojë edhe kur njerëzit e tjerë pushojnë, madje edhe kur pushon ministri.