Lojërat Speciale Olimpike 2013, Nishani dorëzon flakën olimpike

Kreu i shtetit, Bujar Nishani ka përshëndetur sot startimin e “Lojrave Olimpike Speciale 2013”, të cilat kanë për synim dhënien e mbështetjes ndaj komunitetit të personave me aftësi të kufizuara intelektuale përmes integrimit të tyre në aktivitetet social-sportive.

Në fjalën e tij, presidenti Nishani përgëzoi vullnetin e treguar nga pjesëmarrësit në lojrat olimpike speciale dhe ju uroi të gjithë pjesëmarrësve në këto lojra një garë të fortë dhe rekorde në të gjitha disiplinat.

“Ju uroj një kampionat të bukur, garë të fortë dhe rekorde, sa më shumë rekorde në të gjitha sportet dhe disiplinat që do të zhvilloni në këtë periudhë. Ju kam miq të Presidencës, kam mik Ismet Bellovën, të dashuruarin pas sportit , të palodhurin, ndaj me ju rëndësinë e madhe që ka vëmendja angazhimi, përkushtimi, ndihma mbi të gjitha dashuria ndaj jush.

Për këtë ndihmë dhe për këtë respekt falenderoj dhe vlerësoj fondacionin “Vodafon Albania”, për këtë ndihmë që ju jep në vazhdimësi. Besoj plotësisht tek shpirti juaj i garës, tek forca juaj, tek dëshira juaj, të vullneti juaj, që të gjithë ne, kudo ku jemi, të gjithë shqiptarët, duhet të mos harrojmë dhe të motivohemi se jeta është e bukur, prandaj njeriu ka ëndrra, jeta është e vështirë, prandaj njeriu është i fortë, fati është një sfidë, njeriu duhet të ndeshet me të. Prandaj ju duhet të ndesheni sot me të”., u shpreh presidenti Bujar Nishani.

Lojrat Olimpike Speciale zhvillohen për të pestin vit me radhë në Tiranë. Flaka Olimpike që simbolizon hapjen e këtyre lojrave, u dorwzua në orën 17.10 në selinë e Presidencës nën kujdesin dhe praninë e Presidentit të Republikës, Bujar Nishani dhe do qëndrojë e ndezur për disa ditë në ambientet e Universitetit të Sporteve në Tiranë, ku do të zhvillohen aktivitetet sportive dhe garat mes tyre.

Duke iu bashkuar lëvizjes mbarëbotërore  të këtij organizimi, 330 pjesëmarrës të ardhur nga 9 rrethe të vendit do të përfaqësojnë 14 skuadrat olimpike gjatë Lojrave Speciale Olimpike 2013, përkatësisht nga Berati, Durrësi, Elbasani, Lezha, Korça, Pogradeci, Shkodra, Tirana dhe Vlora, në 5 disiplina sportive, përfshirë futboll, basketboll, ping-pong, atletikë, dhe bowling. Këto ekipe përfaqësojnë gjashtë qendrat rehabilituese dhe gjashtë  shkollat e dedikuara per personat me nevoja speciale.

Financimi i këtij evenimenti bëhet i mundur në sajë të kontributit të Fondacionit Vodafone Albania. Për zbatimin e tij u angazhua Olimpiku Special Shqiptar. Ky është një tjetër kontribut që Fondacioni ben ndaj komunitetit të personave me aftësi të kufizuara me qëllim krijimin e mundësive të barabarta për këtë komunitet.