Biznesi i vogël, apo më saktë ai familjar zë pjesën dërrmuese të sipërmarrjes në vend. Kjo formë e strukturës së biznesit pak ka ndryshuar që në kohën e krijimit të ekonomisë së lirë në vend. Sipas të dhënave të Anketës Strukturore të Ndërmarrjeve, publikuar nga INSTAT, 90% e bizneseve në vend janë kryesisht burim vetëpunësimi. Në to numërohen 1-4 të punësuar çka konfirmon edhe peshën ende të ulët të punësim të pjesës më të madhe të kompanive shqiptare. Në vend të dytë, renditen kompanitë me 5-9 punonjës, që zënë 5% të të gjitha bizneseve që operojnë në Shqipëri, ndërkohë që ato me 10-49 punonjës dominojnë vetëm 4% të totalit. Peshën më të vogël, thuajse minimale, e zënë firmat e mëdha me më shumë se 50 të punësuar që zënë vetëm 1% të totalit të bizneseve në vend.