Prokuroria kërkon 15 arrestime të punonjësve të CEZ për mbifaturimet e energjisë elektrike, skandal që plasi dy vite më parë, i denoncuar nga qytetarë dhe më pas institucionet përkatëse. Me urdhër të prokurorisë priten arrestimet e para, ndaj ish punonjësve të kompanisë CEZ-Shpërndarja, apo atyre që aktualisht janë ende në detyra. Lajmi konfirmohet nga burimet zyrtare pranë Gjykatës së Tiranës, ku Task-Forca e Prokurorisë, më mesditën e djeshme, ka dorëzuar materialet e dosjes penale dhe ka kërkuar miratimin e masave “arrest në burg” për 15 zyrtarë dhe ish zyrtarë të dyshuar si përgjegjës për skandalin e mbifaturimeve. Në vazhdim mund të ketë arrestime, pasi nga hetimet e kryera, janë gjetur me shkelje ligjore rreth 50 punonjës të CEZ-it, të cilët kanë abuzuar me detyrën, duke rritur në mënyrë fiktive konsumin e energjisë. Hetimet për këtë skandal, kanë nisur në janar të 2011, kohë kur qytetarët janë njohur me faturat e muajve nëntor-dhjetor 2010. Prokuroria konstatoi vjedhjet në rreth 14 mijë abonentë. Mes të hetuarve edhe ish-drejtuesit e kompanisë çeke që kishin dijeni për skandalin.