Antidroga e Durrësit kapi orët e vona të mbrëmjes së enjte në port një sasi me 2,5 kg heroinë me mbishkrimin “Afganistan” dhe që dyshohet se kishte destinacion Italinë. Në pranga për akuzën “trafik narkotikësh” ra i dyshuari Petrit Meta, 38 vjeç, nga Lushnja. Gjatë kontrollit të ushtruar në pikën e mjeteve në port, në veturën tip “Citroen C-3”, me ngjyrë gri, me targë AA530KZ, me drejtues mjeti me autorizim Petrit Metën, që udhëtonte në drejtim të Barit, me tragetin “Adria”, u gjet edhe droga. Në pjesën e brendshme të kroskotit u gjetën dhe sekuestruan në cilësinë e provës materiale 5 pako të mbështjella me natriban dhe letër alumini, me mbishkrimin “Afganistan”, që dyshohet edhe si vendi i origjinës së drogës. Pesha e përgjithshme ishte 2 kg e 586,5 gramë. Dosja i kaloi Prokurorisë së Krimeve të Rënda në Tiranë.