Gara për “Topin e Artë” të sivjetmë është e ndezur si kurrë ndonjëherë më parë. Edhe pse shumë shohin francezin Riberi si kandidatin kryesor pas sukseseve në sezonin e kaluar, rivaliteti midis Leo Mesit dhe Kristiano Ronaldos është ai që zë pjesën më të madhe të lajmeve, të cilat në këto ditë janë vërtet të shumta. Pas “teatrit” tallës të Blaterit për Ronaldon dhe polemikat që pasuan, tani është vëllai i Mesit që i hedh benzinë zjarrit. Për t’iu kundërvënë tifozëve të portugezit, Matias Mesi ka publikuar në Twitter një foto ilustruese që tregon trofetë e fituar nga secili prej dy rivalëve të mëdhenj. Në foto mungon “Këpuca e Artë”, e cila ende nuk i është dorëzuar si trofe lojtarit të Barcelonës. Kjo është mënyra që vëllai i madh i Leos ka gjetur për të vërtetuar, të paktën sipas tij, se kush është më i miri. Postimi i fotos ka ngjallur shumë reagime midis admiruesve të argjentinasit dhe të portugezit, megjithatë të dyja palët në fund mund të mbeten të zhgënjyera, nëse fitues del Riberi apo ndoshta edhe Zlatan Ibrahimoviç, një tjetër kandidat.