E dashur Dita! U mbushën 80 vjet që nafta dhe vendburimi i saj i ka dhënë atdheut sasi të konsiderueshme nafte dhe gazi. Në këtë betejë të madhe dhe të gjatë me vështirësi kanë punuar me qindra dhe me mijëra naftëtarë kuadro nafte që bënë të mundur zbulimin e kërkimin e vendburimeve të naftës. Po mbush 25 vjet që këto vendburime nafte dhe gazi po shfrytëzohen nga të huajt të cilët kanë marrë me koncesion nga qeveritarët tanë, të cilët i kanë shkaktuar një dëm të madh ekonomisë së vendit.
Me qindra naftëtarë të profesioneve të ndryshme i kanë nxjerrë nga vendet e punës ku ata punonin dhe fëmijët e familjet e tyre janë në gjendje të keqe ekonomike. Ne, të gjithë naftëtarët dhe Shoqata e Naftëtarëve të Shqipërisë i bëjmë thirrje, gjithë naftëtarëve kuadër të naftës, shkencëtarëve të naftës kudo që ndodhen brenda vendit dhe jashtë vendit, të ngrenë zërin fuqishëm dhe t’i themi ndal shkatërrimit të naftës dhe vendburimeve të saj të cilat po vidhen çdo ditë nga firmat e huaja.
Ne naftëtarët dhe Shoqata e Naftëtarëve të Shqipërisë i kërkojmë qeverisë së re t’i shikojë me parësi kontratat e bëra nga qeveritarët e mëparshëm të cilat po vjedhin naftën tonë dhe të prishen kontratat, sa më parë këto kompani të largohen nga vendi ynë. Se ne vendburimet i kemi zbuluar dhe i kemi nxjerrë vet dhe s’kemi nevojë për specialist të huaj. Ne kemi specialistët tanë më të zotë se të huajt. Ne, pavarësisht të persekutuar nga politikanët dhe qeveritarët, i kemi dhënë vendit pasuri të madhe siç është nafta dhe për këtë kemi merita të padiskutueshme të kërkojmë statusin e naftëtarit për sasinë e madhe të naftës që kemi nxjerrë dhe për punën tonë ndër vite.
Shoqata e Naftëtarëve të Shqipërisë, Patos.