“Nëpunësi Civil” në Kushtetuese, ja si kanë votuar nëntë gjyqtarët

Rrëzimi i ligjit për nëpunësin është beteja e parë që opozita fitoi në Gjykatën Kushtetuese.

Vendimi i marrë ditë më parë, megjithatë ka mbetur ende pa u zbardhur.

Revista Java ka mundur të gjejë projekt-vendimin e kësaj gjykate, me të gjitha argumentet që kanë rrëzuar maxhorancën. Sipas projekt-vendimit, Akti Normativ i qeverisë, që shtynte hyrjen në fuqi të ligjit për nëpunësin civil “…cenon parimin e ndarjes dhe balancimit midis pushteteve”.

Në këtë mënyrë, çështja kthehet në pikën fillestare, në atë pikë që sot, pakkush mund të thotë sesi do të dilet nga kjo situatë, sesi do të trajtohen qoftë largimet e mëparshme nga administrata, qoftë dhe rekrutimet e reja në të. Për momentin të dy palët heshtin, edhe maxhoranca, edhe opozita. E para është duke përgatitur përgjigjen e saj ligjore, e dyta duke pritur me një durim që është i rrallë për natyrën e saj, zbardhjen e vendimit të Gjykatës Kushtetuese.

Ka qenë një proces dramatik. Më shumë sesa për natyrën e gjykimit, procesi ishte dramatik për rrethanat në të cilat ai merrej dhe për ndjeshmërinë e fortë politike të tij dhe rreth tij. Katër nga nëntë gjykatësit më të lartë të vendit votojnë kundër. Përfshi edhe vetë kryetarin e Gjykatës së porsakonfirmuar sërish, në një mandat të dytë.

Pesë gjykatësit e tjerë nuk kishin dilema dhe rrëzuan qeverinë. Varianti i tyre i vendimit është pikërisht ai që ka marrë në dorë revista JAVA, ndërsa vendimi i pakicës ende nuk është bërë i ditur. Duke u bërë kështu, ndoshta, dhe një nga arsyet e dukshme të vonesës së zbardhjes së vendimit final. Sipas dokumentit të pafirmosur që disponon revista, konfirmohet se bashkë me kryetarin e Gjykatës Bashkim Dedja, votën pro variantit të maxhorancës e kanë bashkuar gjykatësit Sokol Berberi, Fatos Lulo dhe Besnik Imeraj.

Ndërsa kundër ka votuar relatorja e çështjes Vitore Tusha dhe gjykatësit Gani Dizdari, Vladimir Kristo, Fatmir Hoxha e Altina Xhoxhaj.

Ligji “Për nëpunësin civil” ishte një nga ligjet kusht të BE-së, miratimi i të cilit ishte lidhur me procesin integrues të vendit. Konsensusi për miratimin e tij që kaloi në një kalvar të gjatë ngërçesh, akuzash dhe kundërakuzash, kushtëzimesh dhe dyshimesh reciproke, u prish në mënyrë të njëanshme menjëherë sapo qeveria e re nisi mandatin e saj.

Në 30 shtator të vitit të kaluar, qeveria, me propozimin e ministrit të brendshëm Tahiri dhe ministrit për inovacionin dhe administratën publike, Harito, miratoi një akt normativ në të cilin përcaktohej se ligji për nëpunësin civil hynte në fuqi në datën 1 tetor 2013, por efektet e tij do të nisnin vetëm mbas gjashtë muajsh. Akti normativ u botua në Fletoren Zyrtare po në të njëjtën ditë dhe hyri menjëherë në fuqi. Argumentet që qeveria paraqiste për një akt të tillë ishin disa. Ato nisnim me pazbatueshmërinë e ligjit sepse mungonin aktet nënligjore të tij dhe kohën e pamjaftueshme për të bërë rregullime ligjore sipas procesit legjislativ dhe mbaronin me nevojën e deklaruar për organizimin institucional dhe efektet financiare që derivonin nga zbatimi i ligjit.

Kuvendi, me shumicë të cilësuar votash, pothuaj tre javë më pas, në 17 tetor të vitit të kaluar e miratoi aktin normativ të qeverisë. Më pas, një e pesta e deputetëve të Kuvendit të Shqipërisë, kryesisht deputetë demokratë, republikanë dhe të PDIU-së, ju drejtuan gjykatës me kërkesën për shfuqizimin e aktit normativ të Këshillit të Ministrave, shfuqizimin e ligjit të Kuvendit që e miratoi atë dhe pezullimin e aktit deri sa vetë Gjykata të merrte një vendim të sajin për këtë çështje.

Shkrimin e plotë e gjeni të botuar të shtunën në “Java”.