U zhvillua sot në Tiranë Samitit i Krerëve të Shteteve dhe Qeverive të Procesit të Bashkëpunimit të Vendeve Juglindore (SEECP). Ishte presidenti Bujar Nishani ai që mbajti fjalën i pari, duke u uruar mirëseardhjen të gjithë të pranishmeve, veçanërisht presidentes së Kosovës, Atifete Jahjaga, e cila merr pjesë për herë të parë.
Në këtë Saimit, Nishani u ndal sërish tek ngjarjet e Kumanovës në Maqedoni, duke kërkuar hetim të plotë dhe njëkohësisht kërkoi që tensioni të mos përshkallëzohet më tej. Sipas Nishanit, ngjarjet e fundit treguan se sajdelikat është stabiliteti në rajon dhe që me anë të bashkëpunimit marrëdhëniet mes shteteve fqinje konsolidohen.
“Ngjarjet e fundit në Kumanovë na dëshmuan dhe një herë për brishtësinë e stabilitetit dhe sigurisë në rajon. Me këtë rast dua të përcjell ngushëllimet për humbjet tragjike të jetëve në Kumanovë dhe dënoj dhunën e shfaqur. Kriza që ka përfshirë Maqedoninë nuk duhet lejuar të përshkallëzohet më tej. Pritshmëria jonë legjitime është që të ketë një hetim të plotë dhe të shpejtë për këtë ngjarje që ka tronditur jo vetëm Kumanovën dhe qytetarët e saj të pafajshëm, por të gjithë rajonin dhe partnerët tanë ndërkombëtar.
Bëj thirrje për frenimin e menjëhershëm të përpjekjeve për ta shndërruar këtë episode të paqartë, gjithsesi të izoluar në një burim konflikti të paqenë ndëretnik dhe në vend të saj përqendrimin e energjive në zgjidhjen e të gjitha çështjeve mes palëve me dialog, përfshi dhe zbatimin e marrëveshjes së Ohrit pa ekuivok”