Letër e nënshkruar
Pali Nito
E dashur Dita! Ndoqa me shqetësim ngjarjet kriminale në Kumanovë nga regjimi ushtarako-policor i qeverisë së Gruevskit ku humbën jetën 22 persona dhe u shkaktuan dëme të konsiderueshme materiale.
Ajo që më çudit dhe më revolton është fakti që faktori politik shqiptar këto ngjarje të tmerrshme i përcolli pa nerv e më shumë indiferencë. U befasova veçanërisht nga qëndrimi i liderit politik Ali Ahmeti i cili kur u pyet nga gazetari Fevziu se çfarë masash do të merrni pas asaj që ndodhi në Kumanovë, ai u përgjigj që tani nuk mund të bëjë asgjë, pasi ka një axhendë shumë të ngjeshur. Çdo njeriu me mend në kokë i lind pyetja: A ka axhendë më të rëndësishme se sa ngjarja në Kumanovë?! Për këtë reagoi gjithë rajoni, Europa e më gjerë duke kërkuar gjykim ndërkombëtar dhe transparent ndaj shkaktarëve.
Përsëri pyes, po ku do ta gjejnë mbështetjen dhe përkrahjen shqiptarët e Maqedonisë veçse te faktori politik shqiptar në Maqedoni? Justifikimi i Ali Ahmetit, sa i papërgjegjshëm, aq edhe pa sens. Nuk e kuptoj se si u bë kështu ky yll i qëndresës shqiptare për kontributin që dha në krye të UÇK-së. Mesa duket i dhimbset më shumë pushteti se vuajtjet dhe persekutimet e shqiptarëve.