Jo vetëm depresioni. Po mbi të gjitha problemet në shikim.
Mund të jetë ky motivi i vërtetë që ka shtyrë Andreas Lubitz, bashkëpilotin e fluturimit Airbus të Germanwings, të merrte vendimin për të përplasur avionin me 149 vetë në bord në Alpet Franceze?
Kështu mendon «New York Times», që citon burime nga grupi i hetuesve gjermanë, sipas të cilëve Lubitz kishte fare pak kohë që kishte zbuluar se kishte probleme të rënda në sy, të cilat do ta kompromentonin karrierën e tij si pilot.
Nuk është e qartë megjithatë nëse këto probleme në sy ishin të natyrës organike apo psikosomatike – shkruan NYT.
Kurse e përditshmja gjermane Bild ka arritur të intervistojë të dashurën e Lubitz:
“Më thoshte kohët e fundit që e gjithë bota do ta mësonte emrin e tij. Dhe ankohej vazhdimisht për punën: thoshte se merrte shumë pak para dhe kishte shumë presion” – tregon vajza. / DITA