Partnerët serbë të Imamit shkaktojnë skandal në Malin e Zi

Ministri malazez i Ekonomisë Vladimir Kavariç është në epiqendër të një skandali që ka përfshirë dje këtë vend dhe që lidhet posaçërisht me një kontratë të shitjes së armëve nga Mali i Zi drejt kompanisë shqiptare “MEICO”. Historia zë fill në vitin 2010, kohë kur kompania serbo-malazeze “Montenegro Defence Industry” (MDI) e përfaqësuar nga Zoran Damjanoviç i shiti kompanisë “MEICO” 10.000 predha të tipit “Zolja”. “MEICO”-ja shqiptare i bleu këto predha duke paraqitur një kontratë sipas së cilës këto predha pasi ti blinte nga MDI-ja do ia shiste një kompanie qipriote të quajtur “Zahen Limited”. Ndërsa nga ana e saj kompania qipriote ishte përfaqësuese e shtetit të Gjeorgjisë, i cili do të ishte dhe destinacioni i fundit i këtyre predhave. Por Federata Ruse ka lëshuar një qarkore që kërkon njoftimin e saj për çdo eksport me armë të rënda drejt Gjeorgjisë dhe ministri malazez i Ekonomisë Kavariç duket se e ka neglizhuar këtë fakt dhe ka firmosur kalimin e armëve nga MDI-ja drejt MEICO, duke shkelur detyrimet dhe marrëveshjet dypalëshe mes Malit të Zi dhe Rusisë.

MDI

Dokumentet e publikuara së fundmi flasin për një marrëdhënie  të ngushtë mes autoriteteve shqiptare dhe atyre serbe dhe malazeze. Në vitin 2011 drejtori i MEICO-s Granit Leka ka marrë një letër të mbërritur nga një kompani malazeze e cila e informonte në lidhje me sasinë e municioneve të blera nga kjo kompani në Shqipëri për vitet 2010-2011. Kompania është “Montenegro Defence Industry”(MDI) dhe letra është firmosur nga drejtori I kësaj kompanie, një shtetas serb i quajtur Zoran Damjanoviç. Në letër specifikohen qindra mijëra municione që kjo kompani deklaron se ka blerë në Ministrinë e Mbrojtjes Shqiptare. Drejtori Ekzekutiv i MDI-së, Zoran Damjanoviç duket se përfaqëson një prej lidhjeve më të rëndësishme të shtetit serb dhe atij malazez në tregtinë e armatimeve dhe rezulton protagonist në dërgimin e armatimeve në disa shtete afrikane. MDI-ja në fakt është kompania që ka ekskluzivitetin e tregtisë së armëve në Malin e Zi, është një kompani që nuk ka konkurentë në vendin e saj dhe që ka një influencë të   padiskutueshme mbi Ministrinë e Mbrojtjes së Malit të Zi. Më parë kompania e ka patur emrin “Yugoimport Montenegro”, pra kompania ka lindur si filiali malazes i “Yugoimportit” të Serbisë.

Tesiç

Më parë në media u ekspozua dhe një tjetër kontratë në vlerën e 1 milionë e 700 mijë Eurove mes kompanisë shtetërore MEICO dhe kompanisë “Moon Storm Enterprises” e nënshkruar në vitin 2009. Pikërisht kompania “Moon Storm Enterprises” është kompania e përmendur në kabllogramin e Shteteve të Bashkuara si pronë e trafikantit serb Sllobodan Tesiç. Për kompaninë e Tesiç ka firmosur një shtetasi I quajtur Dejvid Sakashvili. I njëjti ka firmosur edhe një vit më vonë për një tjetër kontratë  e cila kap vlerën e 1.3 milionë eurove porn ë emër të një tjetër kompanie e cila njësoj si e para rezulton e regjistruar në Qipro. Uikiliks ka nxjerrë në pah raporte sekrete ku bëhet fjalë për një tregtar serb të fuqishëm armësh, i quajtur Slobodan Tesiç, i kontraktuar në 2009 për të shitur

95 milionë dollarë me snajpera, antitanke, predha dhe të tjera armë e municione në bashkëpunim me ministrinë e Jashtme të Jemenit. Këto armë Jemeni do i përdorte më pas për të vrarë protestuesit e paarmatosur nëse do demonstronin, që në fakt protestat shpërthyen në muajt e mëvonshëm. Madje “Human Rights” i kërkoi SHBA-ve që të nisnin hetimet dhe të mundësonin ndalimin e dhunës me ndërhyrjen e tyre. “Tesic ka qenë më parë i kontaktuar në kontrata armësh nga shtete si Liberia, Libia, Iraku dhe gjithandej në botë. Ai është një subjekt i nën hetim dhe akuzë i Kombeve të Bashkuara, pasi ka shkelur embargot e tregtisë së armëve dhe trafiqeve me Liberinë në 2002, duke dërguar anije të tëra me armë e municion për të vrarë  popullsinë, duke ndihmuar ish presidentin Charles Taylor, i akuzuar për krime lufte”, shkruan raporti.