Pasojat politike dhe ekologjike të armëve kimike

Siç ka ndodhur edhe herë të tjera, në Shqipëri ka një ulje koke spektakolare dhe vetëshpërfillëse sa s’ka ku të vejë më. Ndodhën “97-ta”, “Gërdeci i përflakur” “shitja e Detit” që kaluan në këtë vend, natyrshëm, si epidemi, dhe indiferenca i pushtoi të gjithë. Kjo është dramatike

“Koloneli i Detit”, Prof. Myslim Pasha, merr pjesë në diskutimin masiv që po bëhet prej ditësh lidhur me shkatërrimin e armëve kimike të Sirisë në Shqipëri. Ja çfarë mendon ai pwr pasojat ekologjike, politike dhe shoqërore në rast se qeveria shqiptare do të pranojë demontimin e këtyre armëve në vendin tonë.

Ç’mendim keni për diskutimin e sotëm lidhur me armët kimike që thuhet se do të vijnë në Shqipëri !?

Po bëhen përgatitjet e para. Testimet, trajtimet e mediumeve të zhurmshme, kolona të kopjuara të protestave në botë, flamuj dhe simbole trupash të shtrirë në simulime të shpëlara, fjalime dhe degëzime të tejshkuara, në të cilat  vjen një Shqipëri që kryengre vetveten kundër Armëve Kimike.  Qeveria hesht në heshtjen e saj plot dramë, e cila kërkon të masë pulsin e bashkësisë së saj dhe pastaj të marrë vendim. Kurse opozita në çast ia vuri çallmën orientale Ramës dhe e emërtoi “Ramastan…” se ashtu ia do puna,  jo se i djeg zemra për ata  shqiptarët që i dogji me Gërdecin e saj fiziko-kimik të korrupsionit shtetëror, por edhe ajo luan me fatkobin tonë. Shqipëria ende nuk është degazuar dhe dezaktivizuar plotësisht prej “ishullimit” të saj militar kur ja … se ia gjetën udhën dhe ia kanë drejtuar orientimin si ta rrëfeje me gisht…:  “Ti,  Lugat e ke emrin Shqipëri. Digju ! Se akoma je e ishulluar…” Këto ditë që ekspertë imagjinarë dhe arlekinë, gjëllijnë në mendje të tyre se ku do të vijnë armët kimike të Assad që hamendojnë në gjeohapësirën shqiptare se ku do të vendosen ato, nga cilat kryeura do të futen dhe në cilat lugina do të afrohen, sa gradë do t’i shmangen Tiranës dhe sa do t’i afrohen maleve të zhveshura,  ku do të renditen, që të përgatiten për laboratorët, se ku do të rrethohen me mburoja, izolime të fetishizuara; me një përkujdesje për rrjedhjet, më shumë se sa laboratorët bërthamorë… ku  vallë në Qafë Mollë?, apo në Qafë Gjarpër?, në Mjeks!? , në  Poliçan? apo  ku vallë… Sikur të ishte afrimi i murtajës…

Nënkuptohet si një rrjedhje…se këtë proces demontimi e kërkon SHBA. Ju ç’mendim keni ?

Ka një keqkuptim të madh dhe një keqinterpretim të sotëm se gjithçka në shoqërinë shqiptare dhe ardhmërinë e saj varet nga SHBA, se ajo ka bërë shumë për Shqipërinë dhe kombin shqiptar (sidomos me Shqipërinë e dytë : Kosovën) etj. Këto janë të vërteta. Por ne duhet t’i largohemi kësaj mendësie. Jemi një vend europian, në NATO, kemi disa detyrime dhe duhet të jemi të barabartë.  A është përzgjedhur Shqipëria? Për këtë s’ka asnjë konfirmim zyrtar. Një heshtje që unë do ta thosha si një rrjedhje e nëndheshme kimike… Pse kështu? Nëse merret një vendim, ne nuk duhet të identifikohemi me gisht: “Ja kush është gogoli . Atje dërgoni armët që të çmontohen e dezaktivizohen…!” Mendoj se nuk ka një detyrim të asillojshëm që e mendojnë se janë mësuar se ndodhen nën kapistër. Fatkeqësisht një mendësi është edhe këtu tek ne në Shqipëri, se ne bëjmë se çfarë na thonë amerikanët. Amerikanët na thonë dhe duhet të na propozojnë gjëra të mira. Nuk kanë pse të na përzgjedhin për të na rrezikuar. Ne jemi kaq të hapur për të thënë se nuk kemi as përvojë dhe as teknologji, e aq më tepër Dheu i shqiptarëve është në një klimë mesdhetare,  të gjallë, jetësore, në bimësi, ujëra me një biodiversitet po kaq jetësor sa rreziku i gabimeve fatale mund të ketë përhapje të gjerë.

A kemi të bëjmë këtu me një përzgjedhje “sipas kokës … dhe qylafin” ?

M’u kujtua Shqipëria jonë e ishulluar gjatë kohës së socializmit të saj kështjellar. Gjatë Luftës së Ftohtë, ndër tunele, xhepa, guva, bunkerë gjigandë, tunele të nëndheshëm, futeshin shtabet, armatimet, municionet, raketat,  topat e rëndë. Sipër bashkësi njerëzore “socialiste’ që s’kish bukë në sofër.  Ky ishullim kishte brenda tij “ishuj të vegjël” të koduar me koordinata dhe emra të epikës veriore të Bjeshkëve, dhe një psikozë flijimi tërësor ngulitej dhe mbillej gjithkund: “Këtë vend mund ta hedhim në erë, prej nëndheut që e kemi mbushur me municion, e kthejmë në vullkan dhe shkretëtirë dhe nuk e dorëzojmë”. Kjo ishte mendësia e Ishullit, edhe pse nuk u hodhëm në erë, pësuam dramat më të mëdha, pasojat e së cilës po i ndjemë edhe sot. Ndërkaq në kohën e kthimit të mbramë, provuam që të zbërthejmë municione dhe armë kimike, me gjak të ngrirë, u dogjën njerëz të vuajtjes e të mjerimit, në tunele të paruajtur, prodhuam eksplozivë të klasit të parë në Mjeks, e mandej krijuam një punishte në afërsi të Aeroportit ‘Nënë Tereza’,  ku shteti i kapur dhe korruptuar nën emrin e Gërdecit shfaqi shpërthimin e parë  të mallkimit mbi popullin që ish ndotur dhe rrezatuar, me armët e municionet të cilat prej shenjtërisë së mbrojtjes së dikurshme i  shndërroi në djegie të vetvetes, prej lakmisë fitimprurëse. Akoma e kemi ndër sy kërpudhën e llahtarit Gërdecian. S’na ndahet në përfytyrim. Dhe ja tani duket se një “mallëngjim” kimik  nëndheshëm , po pse jo edhe i shpërndarë në efir në padukshmërinë e valëve elektromagnetike i përsillet Shqipërisë. Pse vallë Shqipërisë ? Mesa duket ia dinë kokën, ia dinë shtatin e mundimit e të pritjes, ia dinë përulësinë. Prandaj butë e butë e plot tigani kimik po ia bëjnë propagandën parësore që t’ia sjellin këtij “ishulli” që ende nuk është bashkuar me Kontinentin…

Ç’mund të veçoni për pasojat ekologjike ?

Ku do të gjendet kjo pllajë, ky yrt Shqipërie, që të jetë i favorshëm për laboratorin e madh të shkatërrimit, që të ketë një klimë antirrjedhje?  Po ç’është ky Dhe Shqipërie, kjo klimë  që të jetë më pak e favorshme për ta bërë qoftëlarg të pafavorshme, për vetveten? Po psikoza që do mbjellim? Për vite me radhë, ndofta njëzetë vjet e më shumë do ta kemi atë Yrt, atë Luginë atë pllajë si një vurratë vdekjeje të rrethuar më keq se centralet bërthamore? Po bimësia që është prerë, gurët e zhveshur, po ujërat dhe lloji i tokave, me një hidrografi të jashtëzakonshme ballkanike? Rrjedhje rrezatim kalim në kapilarë të Dheut dhe transmetim një ekologji që mbarset me rrezikun vdekjeprurës.

 A do të ketë pasoja politike ?

Doemos do të ketë pasoja politike për Partinë socialiste dhe Edi Ramën si Kryeministër. Por mund të pritet një vendim i guximshëm (siç po duket) që edhe pse reagimet janë të përmasave të gjera, armët kimike të pranohen. Siç ka ndodhur edhe herë të tjera, në Shqipëri ka një ulje koke spektakolare dhe vetëshpërfillëse sa s’ka ku të vejë më. Ndodhën “97-ta”, “Gërdeci i përflakur” “shitja e Detit” që kaluan në këtë vend, natyrshëm, si epidemi, dhe indiferenca i pushtoi të gjithë. Kjo është dramatike.