Pero Pejiç shënoi në sekondat e fundit të lojës, duke shpëtuar Skënderbeun nga humbja në Laç. Vendasit kaluan dy herë në epërsi dhe në të dyja rastet ishte sulmuesi kroat që barazoi për korçarët. Fitorja u duk pothuajse e sigurt kur Nimani shënoi golin e dytë për Laçin pesë minuta para mbarimit, por minuta e 93-të vendosi ekuilibrin përfundimtar. Laçianëve mund t’u vijë keq që u iku fitorja nga duart për pak sekonda, megjithatë ishte një ndeshje e fortë dhe korçarët patën rastet e tyre, ndaj barazimi mund të quhet rezultat i drejtë. Mladen Brkiç, ish-lojtar i Skënderbeut, shënoi golin e parë të takimit dhe vendasit e mbyllën me fitore pjesën e parë. Skënderbeu sulmoi më tepër në pjesën e dytë, deri sa arriti barazimin.
Asnjë prej skuadrave nuk qëndroi në pritje dhe u të dyja u hodhën në sulm për të shënuar golin e dytë. E gjetën laçianët, me Nimanin, por edhe me ndihmën e fatit e të mbrojtësit Bici, pasi topi u përplas në shtyllë dhe Bici pa dashje e çoi në rrjetën e tij. Me golin e Pejiçit, Skënderbeu përfiton sërish në krye të renditjes, pasi diferenca me vendin e dytë, tani mbajtur nga Teuta, shkon në nëntë pikë, nga tetë që ishte një javë më parë kundrejt Partizanit. Laçit i ikën rasti për të kapërcyer Partizanin në renditje, por këtë rast e ka humbur edhe Kukësi, i frenuar pa gola në shtëpi nga Bylis.
Presidenti Safet Gjici konvertoi në gjobë pezullimin e fushës, për të pasur përkrahjen e tifozëve, por as kjo nuk e ndihmoi skuadrën të kthehej te fitorja. Në dy ndeshjet e para të këtij viti, skuadra e Naxhi Shensojit ka dy barazime pa gola. Edhe dje nuk arriti të krijonte shumë raste, pavarësisht se u përpoq mjaft. Me të njëjtat shifra u mbyll edhe ndeshja e zonës së ftohtë, midis Lushnjës e Kastriotit. Lushnjarët nuk falin në shtëpinë e tyre, por dje nuk mundën të shkonin më larg se 0-0 kundër krutanëve. Ky rezultat midis tyre, si dhe barazimet e Bylisit dhe Vllaznisë, sjellin afrimin e Tiranës, tani shtatë pikë larg zonës së shpëtimit.
Kategoria Superiore
Java e 18-të
Të premten
TIRANA-PARTIZANI 1-0
Gilberto 76’
Të shtunën
VLLAZNIA-TEUTA 1-1
Shtubina 93′ / Nika 16′
FLAMURTARI-BESA 1-4
Liçaj 2′ / Haliti 30′, Sefa 61′, 94′, Deliallisi 93′
Dje
LAÇI-SKËNDERBEU 2-2
Brkiç 33, Nimani 85′/ Pejiç 55′, 93′
KUKËSI-BYLIS 0-0
LUSHNJA-KASTRIOTI 0-0
Renditja
N Skuadra P Gol F B H
1 Skënderbeu 37 27:14 11 4 3
2 Teuta 28 27:23 7 7 4
3 Laçi 27 21:18 8 3 7
4 Partizani 27 16:14 8 3 7
5 Kukësi 27 17:16 7 6 5
6 Besa 25 21:18 7 4 6
7 Flamurtari* 25 21:20 8 4 6
8 Bylis 23 19:16 5 8 5
9 Vllaznia 22 23:23 6 4 8
10 Lushnja 19 16:26 5 4 9
11 Kastrioti 18 10:17 5 3 10
12 Tirana 16 7:17 4 4 10
* Flamurtari -3 pikë