Pjerin Ndreu: Më bënë kriminel për një prekje. Kriminelët e vërtetë po hedhin valle

Deputeti socialist, Pjerin Ndreu, ka reaguar sërish pas akuzave të fundit ndaj tij. Ndreu thotë se po e bëjnë kriminel për një prekje apo goditje, duke iu referuar ngjarjes me Gent Strazimirin.

“Fantazia e disa zemërzinjve, xhelozëve dhe “parashikuesve” shkon shumë larg…! Unë jam mësuar tërë jetën me të tillë maskarenj..! Çudia do të ishte nëse do gjykonin ndryshe!

Por ju premtoj se do ju ngelet shija e hidhur në buze sepse në jetën e trupin tim nuk do ketë kurrë vend për të keqen që shumëkush me shumë zell ka vite që e kërkon te unë! Nëse një prekje apo qoftë edhe goditje është shkak për kriminalizim këtu, atëherë paska mbaru ky vend!”, thekson Ndreu.

Deputeti socialist o cili është edhe anëtar i Komisionit parlamentar për Sigurinë Kombëtare, thotë se kriminelët e vërtetë po hedhin valle të qetë nën zhurmën shurdhuse të zëdhënëseve të krimit që kanë marrë frenat e përbaltjes së kujtdo që nuk i shkon për shtat.

“Më vjen keq, por kriminelët e vërtetë po hedhin valle të qetë nën zhurmën shurdhuse të zëdhënëseve të krimit që kanë marrë frenat e përbaltjes së kujtdo që nuk i shkon për shtat!

Më mirë me baltën e këtyre batakçinjve në fytyrë se sa pjese e klaneve te shëmtuara të së keqes dhe krimit që e ka lënë këtë vend prej 23 vitesh në një mjerim të skajshëm! Jam në paqe me veten dhe ndjej neveri për llumin që spërkat dhe ndot shoqërinë!”, shprehet Ndreu.