LSI kërkon interpelancë me Bushatin për lumin Radika

Lëvizja Socialiste për Integrim kërkoi sot një interpelancë urgjente me ministrin e Jashtëm, Ditmir Bushati, lidhur me çështjen e devijimit të lumit Radika. Në emër të LSI, kreu i grupit të saj parlamentar, Petrit Vasili, tha se qeveria duhet të reagojë.  Vasili theksoi se transparenca dhe interesat e vendit duhet të jenë mbi çdo gjë.

“Autoritetet shqiptare të kërkojnë zbatimin e marrëveshjes. Bashkohemi me shqetësimet e mëdha të opinionit publik mbi këtë çështje, sikundër me qëndrimin që po mbajmë po bëjmë detyrën tonë ndaj pasurisë së përbashkët kombëtare”, tha Vasili.

PD: Qeveria të bëjë transparencë për lumin Radika

Po sot, deputeti demokrat i Qarkut të Dibrës, Roland Keta, tha se PD kërkon që kryeministri Rama dhe ministri i Jashtëm Bushati,  të dëgjojnë zërin e qytetarëve lidhur me këtë çështje.

“Partia Demokratike i kërkon qeverisë shqiptare të bëjë transparencë në lidhje me një projekt të qeverisë maqedonase që parashikon devijimin e Lumit Radika.  Nëse ndodh, ky devijim sjell dëme të pallogaritshme për territorin dhe jetën e më shumë se 20 mijë banorëve të Dibrës së Madhe, të cilët janë në mazhorancë shqiptarë. Por gjithashtu, sjell dëme të mëdha jo vetëm ekologjike por dhe ekonomike, edhe në rrethin e Bulqizës dhe Dibër”, tha Keta.

“Ne i kërkojmë Ministrit të Jashtëm dhe Kryeministrit të dëgjojnë zërin e banorëve të Dibrës, të Bulqizës, por dhe zërin e shqiptarëve që banojnë në Dibrën e Madhe, të dëgjojnë zërin e intelektualëve dhe shoqërisë civile në vend,  dhe të reagojnë menjëherë e të bëjnë publike, se çfarë po ndodh,çfarë është ky projekt i palës maqedonase, dhe cila është zgjidhja që nuk sjell dëme për qytetarët tanë.  Këto janë problemet reale të shqiptarëve, dhe nuk mund të trajtohen me politikën e zero problemeve me fqinjët”, tha ai.

Protesta e së dielës në Tiranë

Dhjetëra qytetarë u bënë dje pjesë e protestës së organizuar në kryeqytet kundër devijimit të rrjedhës së lumit Radika. Sipas tyre, nuk duhet lejuar zbatimi i projektit që parashikon ndërtimin e hidrocentralit në “Fushën e Lukovës” në rajonin Dibër-Mavrovë. Aleanca kundër Devijimit të Lumenjve, e mbështetur edhe nga organizata të tjera joqeveritare për mbrojtjen e mjedisit, i bënë thirrje qeverisë shqiptare që të mos lejojë devijimin e asnjë cm3 ujë të lumit nga shtrati natyror. Ata kanë kërkuar nga Parlamenti shqiptar dhe qeveria të reagojnë ndaj veprimeve të qeverive greke e maqedonase, për devijimin e rrjedhës së lumit Radika.

Një protestë e ngjashme është mbajtur ditët e fundit në Nju Jork  nga shoqata atdhetare “Dibra”, e cila i ka dërguar një letër selisë së OKB-së dhe qeverisë amerikane, duke argumentuar dhe dëmet që sjell zbatimi i këtij projekti, jo vetëm në devijimin e ujërave, por dhe në aspektin ekologjik.