Si do të përfitohet legalizimi falas?

Kryeministri Edi Rama ishte i qartë dje në pasditen e vonë se çfarë do të ndodhë me legalizimin e banesave informale. Procesi i legalizimit do të jetë falas, e që më pas drejtori i ALUIZNIT, Artan Lame e sqaroi për gazetën Dita, se çfarë do të thotë kjo. “I gjithë procesi do të jetë falas, pra shteti merr përsipër të gjithë kostot burokratike të procesit, si hartën, noterinë, marrëveshjen etj”, u shpreh Lame. Të dhënat që ky institucion ka deri tani, flasin për rreth 250 mijë banesa informale, të legalizuara nga qeveria e kaluar 21 mijë prej tyre, por që do të rifuten sërish në proces për shkak të amullisë së dokumentacionit dhe problemeve që kanë shfaqur në proces. Lame është i qartë në sqarimin e tij mbi këtë proces kur thotë se tashmë qytetarët nuk do të shkojnë më në zyrat e ALUIZNI-t, por do të jenë punonjësit e këtij institucioni që do të shkojnë derë më derë për të përfunduar procesin. Sipas llogaritjeve të bëra deri tani, 67 mijë banesa janë në tokën e tyre dhe sipas Lames për ta jo vetëm procedura është falas, por ata do të marrin tapitë e tyre me kosto 0.  Pjesa tjetër me ndryshimet e reja ligjore për legalizimet që pritet të miratohen në muajin prill, do të kenë përfitime të dukshme. “Ata që do të paguajnë të gjithë vlerën e banesës, do të kenë ulje 20 për qind, ata që paguajnë me letra me vlerë 30 për qind”, janë disa nga detajet që jep Lame për gazetën duke cilësuar dhe një fakt të rëndësishëm “çmimi i tokës, nuk do të jetë me vlerën e tregut, por me gjysmën e saj”. Në këtë mënyrë zbardhet skema e këtij procesi mjaft delikat e të ndjeshëm, me shpresën që do të zgjidhet një nga ngërçet më të mëdha të këtyre 20 viteve të fundit.

Të dhëna

250 mijë banesa janë informale

67 mijë familje që e kanë tokën e tyre e përfitojnë legalizimin pa asnjë kosto

21 mijë banesa janë legalizuar nga qeveria e kaluar (do rifuten në proces)

***

Legalizimet, Rama: Procesi falas. Do jeni pronarë të shtëpive tuaja

Kryeministri Edi Rama, zgjodhi pasditën e djeshme dhe Paskuqanin për të bërë publik planin e ri të qeverisë shqiptare për legalizimin e ndërtimeve informale dhe urbanizimin e të gjithë zonave duke i kthyer në kapital të çliruar. Gjatë takimit Rama ka shpërndarë çertifikatat e para të cilat regjistrohen në hipotekë dhe e bëjnë pronën aktive. Kreu i ekzekutivit deklaroi se qeveria ka ndryshuar ligjin aktual të legalizimeve, i cili më pas do të marrë votën e Kuvendit. Thelbi i këtij ndryshimi ka të bëjë me skemën e procesit të legalizimeve, ku nuk janë qytetarët që do të shkojnë te zyrat e shtetit, por administrata do të shkojë tek qytetarët për të kryer procesin e regjistrimit të banesave informale. Kryeministri deklaroi se procesi i legalizimit për qytetarët që kanë ndërtuar shtëpi banimi do të jetë falas, ndërsa për ata që kanë ndërtuar për objekte biznesi, procesi do të kryhet me faturën përkatëse.

Falen penalitetet

Edi Rama deklaroi se qeveria do të falë të gjitha penalitetet që i janë vënë qytetarëve në të shkuarën. “Këto ndryshime do t’i kalojnë për miratim përfundimtar parlamentit dhe do të na garantojnë zotimin tonë që ju dhe si ju mbi 200 mijë familje që presin prej vitesh legalizimin të mund të bëheni pronar legjitim të shtëpive tuaja. Shtëpitë tuaja të kthehen nga kapitale të vdekura, në kapitale të qarkullueshme, që do nxisin ekonominë e familjes suaj”, theksoi Rama. Kryeministri cilësoi gjithashtu se “ne kemi pasur një plan shumë të qartë për legalizimet dhe duhet ta kujtoni sepse besoj është me rëndësi që unë personalisht së bashku me Artan Lamen, kemi qenë të parët në Shqipëri që kemi folur për legalizimet, kemi qenë të parët që kemi bërë një plan legalizimesh, kur ishim në fillim të rrugëtimit tonë për të modernizuar Tiranën”. “Plani ynë solli një produkt të rëndësishëm, qytetarët i morën informacionin nga njësia bashkiake, por mbetën peng të peshkaqenëve që drejtonin ALUIZNI-n, por sot përfundoi kjo padrejtësi, pasi ne vendosëm t’ju japim mundësi të gjithë shqiptarëve që kanë sakrifikuar shtëpitë e tyre për një jetë më të mirë të realizojnë ëndrrën e tyre”, tha Rama, i cili kujtoi se kanë qenë rreth 160 mijë familje që kanë tetë vjet që sorollaten nëpër Tiranë për të legalizuar pronën e tyre.

Skema e regjistrimit

Në ligjin e ri gjëja e parë që ndryshon është skema e veprimit e cila kthehet në të kundërt. Tashmë nuk shkon qytetari tek shërbimi por shërbimi që vjen tek familja. “Skema e vlerësimit të trojeve, përsa i përket atyre trojeve që janë me pronarë apo shtetërorë do të ndryshojë se nuk mund të ketë të njëjtën vlerë toka. Nga ana tjetër ne kemi ndryshuar skemën e dokumentacionit. Kush do të bëjë dokumentacion, do të shkojë në hipotekë dhe do të bëhet pronar i shtëpisë. Këtë proces e kemi të përqendruar të zonat informale, sepse ka shumë familje që janë në vështirësi ekonomike, edhe për këto do të ketë trajtim të veçantë. Legalizimi bëhet në radhë të parë si një borxh ndaj gjakut, sakrificave dhe mundit të atyre që janë sot pronarë të një shtëpie ku kanë hedhur gjithçka kanë pasur. Për ata bëhet legalizimi në radhë të parë, të tjerët të rrinë në radhë dhe të paguajnë”, tha kryeministri.

Fatura e energjisë

Ndërkohë shefi i qeverisë informoi qytetarët se procesi i legalizimeve nuk do të kufizohet me detyrimet e papaguara ndaj kompanive të energjisë elektrike. “Nëse ju do paguani 400 mijë lekë për legalizimin kur toka nuk është e jotja, atëherë do t’ju marrim 360 mijë lekë dhe 40 mijë lekëshin do ta lemë barrë hipotekore, që ju do ta hiqni pas dy vjetësh kur të tregoni faturat e energjisë. Në shumën e legalizimit do t’ju marrim 40 mijë lekë më pak, do t’jua lemë të paguani energjinë elektrike dhe t’jua lemë barra atje. E rëndësishme është të paguani të gjithë energjinë, të futeni në sistem”, tha Rama, i cili shtoi se “tashmë janë të gjitha kushtet që ta mbyllim këtë proces më faqe të bardhë për të dy palët. Ne jemi gati, kush është gati nga ju thjesht duhet të ndjekë procesin dhe të marri tapinë në dorë”.

Xhaxhai i Azem Hajdarit, një nga 20 kryefamiljarët që mori dje tapinë nga Rama

Në listën e 20 kryefamiljarëve që dje morën tapinë nga kryeministri Edi Rama, ishte dhe xhaxhai i deputetit të ndjerë të PD-së, Azem Hajdari.  E në këtë takim të djeshëm ku dha 20 tapitë e para kryeministri nuk mund të kalonte pa një batutë. “Pa dashur të bëj politikë këtu, siç tha Lamja, sepse këtu ka shumë që nuk na ka dhënë votën, dhe nuk ka asnjë problem, ne do t’u japim tapinë. Edhe kjo është arrije tjetër, që votën s’e jep, tapinë e merr. Jo siç thoshin ata “më jep votën, që unë të vij ta masë shtëpinë”. Siç thoshte Shabani – “më jep votën, pastaj vij ta mas prap”.

Lista

Qytetarët që kishin aplikuar që në vitin 2006, të cilët morën  lejet e legalizimit

Maxhun  Hajdari

Abdulla  Cani

Ylber Torba

Sokol  Prençi

Niko  Mihas

Pëllumb Cani

Hasan  Xheçuka

Edmond Hasantare

Ahmet Cani

Rexhep Sulaj

Gjon Gjini

Avni  Dragjoshi

Flamur Sulaj

Xhemal  Cani

Qemal  Shahini

Adrian Kamberi

Maringlen Ceci

Mehdat Prençi

Fatmir Lakasi

Sadik  Hajdarmataj