Rama me të rinjtë: Do t’u kthejmë besimin se ëndrrat mund të realizohen

Kreu i Partisë Socialiste, Edi Rama, ka zhvilluar sot një takim me të rinjtë në Petrelë, Tiranë. Rama ka prezantuar kapitullin për rininë, pjesë e programit “Për një Rilindje Shqiptare” dhe u shpreh se qeveria socialiste e pas 23 qershorit do t’iu rikthejë atyre besimin se ëndrrat dhe shpresat mund të realizohen. “Ne jemi të vendosur që t’i rikthejmë shkollat në qendra komunitare. Ne jemi të vendosur që t’ua kthejmë investimet prindërve tuaj, që sakrifikojnë shumë për ‘ju çuar juve në shkollë. Por njëkohësisht t’ju rikthejmë juve, në fund të këtij rrugëtimi, investimin e energjive kohës dhe të mundit tuaj për tu pasuruar me dije”, u shpreh kreu i PS-së.

Rama tha se programi i PS ka për qëllim t’u japë fshatarëve mundësinë që të krijojnë mirëqenie, njësoj siç ndodh në vendet e tjera të Europës.
“Toka sot nuk i jep njerëzve që jetojnë në fshat mundësinë që të krijojnë mirëqenie. Ne duam që toka ta bëjë këtë, ashtu siç e bën në të gjitha vendet e Europës, ku nuk ekzistojnë më fshatarët e varfër. Toka është një pasuri e madhe që mund të prodhojë pasuri të mjaftueshme për njerëzit që jetojnë në fshat dhe mund të garantojë vazhdimësinë e një jete normale për gjeneratat e reja të fshatit”, tha Rama.