Rama në zonën e ish-Kënetës: Do mbyllim plagën e legalizimeve

Kryeministri Edi Rama zhvilloi sot një bashkëbisedim me banorët e ish-Kënetës në Durrës. Rama tha se qeveria është e vendosur të mbyllë plagën e madhet të legalizimeve, duke përmbushur premtimin e fushatës  për rilindjen e vendit.

“Jemi sot këtu për të çuar përpara realizimin konkret  të një zotimi madhor të fushatës sonë për rilindjen e vendit dhe jo vetëm fushatë së PS-së por edhe të fushatës së LSI-së për të shkuar më shpejt drejt një Shqipërie normale, drejt një Shqipërie europiane. Dhe si Aleancë të Shqipërisë Europiane ne sot jemi këtu pasi jemi të gatshëm që zotimin tonë për të mbyllur legalizimet si një plagë e madhe e thelluar dhe e infektuar në vite falas  ta bëjmë realitet duke filluar në çdo zonë të Shqipërisë  për dhënien e dokumenteve të pronësisë për të gjithë ata që kanë aplikuar vite më parë”, tha Rama.

Rama tha se qeveria e kaluar i pajisi këto familje me dokumente false, ndërsa shtoi se ato që shpërndahen sot nga qeverisja aktuale janë tituj të vërtetë pronësie.

“Mos harrojmë se janë 160 mijë aplikime të bëra në vite për të cilat nuk është bërë asgjë dhe askush nuk i ka vajtuar t`u trokasë në derë qytetarëve. Dhe janë dhjetëra mijëra në to për të cilat familjet kanë paguar tre herë pa llogaritur ato që kanë paguar për xhepat e atyre që shfaqeshin në dyert tuaja sa herë afrohej një fushatë elektorale dhe madje shkuan deri aty sa t`ju jepnin edhe letra false. Ne sot kemi ardhur t`ju japim dokumente pronësie, tituj pronësie.  Kemi bërë një ndryshim themelor në proces duke vendosur  që ALUIZNI të vijë tek ju dhe të jetë shërbëtori juaj për të përballuar gjithë procesin dhe për të plotësua gjithë  dokumentacionin. Ai dokumentacion që ishte tortura më e madhe e familjeve që donin të bënin një legalizim sot jo vetëm që do të bëhet me asistencën e drejtpërdrejtë të ekspertëve të ALUIZNI-it, por do të jetë i gjithi falas dhe të gjithë procesin e mban përsipër shteti” shtoi Rama.

Kreu i qeverisë shtoi më tej se pas dhënies së certifikatë së pronësisë, shtëpia e çdokujt do të kthehet në kapital që do të shërbejë ai garanci edhe për të marrë kredi.

“Nga ana tjetër falas do të bëhet legalizimi edhe për të gjithë familjet pa përjashtim sepse ne duhet t`i japim fund këtij procesi duke i krijuar mundësinë çdo familje që ka ndërtuar një shtëpi të bëhet pronar. Ne e bëjmë këtë edhe për ekonominë familjare të gjithë secilit, por edhe për ekonominë kombëtare.  Sepse këto familje që janë me dhjetëra mijëra kanë investuar gjithçka që kanë pasur dhe gjithë paratë që kanë mundur të kursejnë i kanë nëpër mure dhe në çati. Në momentin kur sot shtëpia kthehet në një pronë të regjistruar, ajo nuk është më vetëm një strehë, por një kapital që mund ta qarkullosh. Me këto letra ai mund të shkojë në bankë të marrë një kredi për të hapur një biznes të vetin, të vetëpunësohet dhe të bëjë një aktivitet tregtar dhe ekonomik” shtoi Rama.