Rama: Nuk pranojmë asnjë marrëveshje që shkel Kodin Zgjedhor

Partia Socialiste mbështet thirrjet e partnerëve ndërkombëtarë për çështjen e anëtarit të LSI-së në KQZ dhe nuk pranon të bëhet pjesë e asnjë marrëveshjeje që cenon Kodin Zgjedhor. Qëndrimi i prerë erdhi sot nga kreu i PS-së, Edi Rama, gjatë një konference për shtyp nga selia rozë.

Rama tha se thirrjet e SHBA-së dhe BE-së janë të forta dhe të qarta dhe PS nuk toleron shkeljen e Kodit Zgjedhor dhe tentativën e paligjshme për të uzurpuar KQZ-në.

“Kuturisja e Saliut për ta kthyer shumicën prej kartoni në një kamikaz që hedh në erë KQZ-në, deklaratat e troçta të SHBA-së dhe BE-së janë thirrje të forta që një marrëzi e tillë të mos ndodhë. Nisma e zëvendësimit të një anëtari të KQZ përmes Parlamentit është e paligjshme. KQZ në momentin e marrjes së mandatit nuk ka më asnjë varësi nga parlamenti dhe politika. Ne do ta respektojmë Kodin Zgjedhor dhe as do të tolerojmë shkeljen e tij për të uzurpuar KQZ-në dhe as të bëhemi pjesë e ndonjë marrëveshjeje që anashkalon kodin. Asnjë parti nuk ka më asnjë lloj të drejte të ndërhyjë në përbërjen e KQZ-së. Dua të theksoj se në asnjë rast dhe për asnjë arsye nuk duam të hyjmë në marrëveshje për ndryshimin e KQZ. Ky është momenti që Saliu të mendojë si të iki me nder nga pushteti”, tha Rama.

Kreu i PS-së u shpreh i bindur në fitoren e së majtës në 23 qershor. “Edhe sikur votat të numërohen në shtëpinë e Saliut, largimi i tij është i pashmangshëm”, tha ai.