Rama: Shqipërisë nuk i mungojnë 3 ligje për të hyrë në Europë, por 3 pushtete

Partia Socialiste ka organizuar sot një tryezën për dhunën në familje. Gjatë fjalës së tij, kreu i socialistëve, Edi Rama, tha se shifrat e kriminalitetit në vend janë në nivele alarmante, mes të cilave edhe ato të vrasjes së femrave.

“Çështja e krimit nuk është një çështje që trajtohet dhe zgjidhet vetëm në përplasje me krimin. Transformimi nuk ka ndodhur, në vitin 2011 kishte një shifër të vrasjes së grave 19, ndërsa PS përmes deputetes socialiste Vasilika Hysi solli një paketë për dhunën në familje. Mirëpo në vitin 2012, vrasja e grave shkoi në 24. E pra Shqipërisë nuk i mungojnë 3 ligje për të hyrë në Europë, por pushteti legjislativ, ekzekutiv dhe gjyqësor”, deklaroi Rama.

Kryesocialisti Rama tha se dhuna në rritje brenda familjes është tregues i rrënimit të përgjithshëm. Sipas tij, në vitin 2005, kur PD erdhi në pushtet, numri i vrasjeve ishte më i vogël, ndërsa sot numërohen 12 mijë vrasje më shumë, si një shifër e papranueshme në raport me të shkuarën dhe vetë kontekstin e Europës ku Shqipëria kërkon të integrohet.

Rama theksoi se policia shqiptare është më e keqpaguar se çdo polici në rajon, madje punonjësit e këtij sektori që përballet me krimin e nuk marrin më as shpërblimet dhe as orët shtesë.