Rama: Vota për një kryeministër që thotë se jemi të katërtit në botë do të thotë tallje me veten

Kreu i PS-së, Edi Rama, ka reaguar në Tuiter për deklaratat e kryeministrit Berisha të bëra sot në Berat. Duke komentuar fjalën e Berishës për rritjen ekonomike, Rama shprehet se është vetëmohim të votosh një kryeministër që thotë se Shqipëria është e katërta në botë për rritjen e ekonomisë.
“Çfarë vetëmohimi duhet për ta votuar një kryeministër që thotë Shqipëria e katërta në botë me Zvicrën e Brazilin! Kush e voton tallet me veten keq fare”, shkroi Rama në Tuiter.

Reagimi i Ramës vjen si përgjigje ndaj akuzave të Berishës, i cili gjatë një takimi me simpatizantë të PD-së në Berat, tha se Rama po bllokon integrimin e vendit me mosvotimin e tre ligjeve. Gjatë këtij takimi, Berisha iu drejtua Ramës me fjalët: “E vërteta është se sot je i vetmi dhe i vetmi në politikën evropiane që përdor pushtetin e ndershëm të qytetarëve socialistë shqiptarë për të bllokuar procesin e integrimit, paçka se bërtet çdo ditë për papunësi, nga ana tjetër privon shqiptarët nga qindra milionë euro që do i akordoheshin më marrjen e statusit të vendit kandidat”.

Si për ironi, gjatë takimit të Berishës me simpatizantët e PD-së, ndodhi diçka e paparashikuar që ka lidhje pikërisht me punësimin. Një vajzë e re u ankua se kishte katër vjet që kishte mbaruar studimet dhe nuk gjente punë. Pavarësisht se ky episod u mbulua me muzikë nga regjia, gjithçka ndodhi live dhe Berisha u detyrua ta drejtojë të renë tek kreu i PD-së së Beratit.