Rovena Dilo: Ja e vërteta e konfliktit për pronën me Tom Doshin e Ndriçim Babasin

Këngëtarja e njohur, Rovena Dilo, prej një viti është përballur me gjykatat , për çështje pronësie me deputetin e Partisë Socialiste, Tom Doshi dhe ish­-deputetin demokrat, Ndriçim Babasi.

Bëhet fjalë për përvetësimin e një sipërfaqeje toke në zonën e ish-­Bllokut, të njohur si bar “Rovena”. Në çështjen me nr.12155 të hapur më datë 26 qershor 2014, këngëtarja Dilo është paditur nga Ndriçim Babasi e Tom Doshi. Prona, që njihet tashmë si “Bar Rovena”, ndodhet në zonën kadastrale 8270, me sipërfaqe 887 m2, dhe me adresë të pasurisë rruga “Vaso Pasha”. Këngëtarja ka pasur probleme në të shkuarën me këtë pronë, ku daja i saj, Agron Visha ,njëkohësisht ortak i Rovena Dilos në shoqërinë tregtare de­fakto “Vreto”, i ka shitur këtë pronë Doshit dhe Babasit.

Një javë më parë, Gjykata e Tiranës ka pranuar kërkesën e Doshit dhe ish- deputetit demokrat, Ndriçim Babasi mbi këtë pronë në zemër të Bllokut, ku ka urdhëruar këngëtaren Rovena Dilo të dorëzojë pronën. Dilo nuk e ka pranuar këtë gjë dhe e ka dërguar çështjen në Prokurori, e cila po e heton. Në një intervistë për Tema Tv, këngëtarja Rovena Dilo shprehet se prej një viti është në proces gjyqësor dhe nuk do të ndalet derisa e drejta të dalë në dritë.

“Procesi gjyqsor ka nisur para një viti. Unë jam e paditur dhe paditësit janë Tom Doshi dhe Ndriçim Babasi. Këta kanë pretenduar se shtetësja Rovena Dilo ka pushtuar, zaptuar truallin prej 887 metër katror në rrugën “Vaso Pasha” që është pronë e gjyshit tim Naim Vretos. Pretendimi i tyre është që unë ta liroj këtë pronë. Mirëpo këtë truall nuk e ka zaptuar Rovena, por shoqëria tregtare de­fakto “Vreto” e themeluar që në vitin 2000 dhe ka 2 ortakë, Rovena Dilon dhe dajën e saj, Agron Vreto”, thotë ajo.

Këngëtarja fajëson dajën e saj, si nismëtarin e gjithë kësaj historie, duke i shitur pa dijeninë e familjes, truallin Tom Doshit dhe Ndriçim Babasit kundrejt shumës 200 mijë euro. “E gjithë kjo është prodhur nga ky person, me një akt­dhurimi absulitisht të pavlefshëm. Ka bërë të vetën 30 mijë metër katror duke mashtruar dhe grabitur familjen e tij. Dhe ky person e ka grabitur vetëm për 200 mijë euro. Por, familja ime nuk ka nevojë ta shesë për kaq lekë, pasi nuk ia ka nevojën. Ne nuk kemi qenë në dijeni të shitjes. E kemi marrë vesh rastësisht e në mënyrë të papritur. Ne do ta vazhdojmë procesin gjyqësor derisa gjykata të vendosë drejtësi”, thotë Dilo.

Këngëtarja ka kërkuar edhe vëmëndjen e medias për të gjithë këtë proces. Ajo kërkon nga media të jetë transparente pasi nuk ka besim tek procesi gjyqsor. “Procesi gjyëqsor është totalisht problematik dhe për këtë kam thirrur median që gjithçka të jetë transparente”, thekson Dilo.