Replikë e detyruar / Si mund të jetë në paqe me veten Kristaq Gerveni?

Këto ditë, pas problemeve të acarimit të marrëdhënieve me Greqinë për shfrytëzimin e hidrokarbureve në Detin Jon u afrua edhe marrëveshja e ndarjes së kufijve detarë. Doli nga istikamet një negociator i rëndësishëm (por jo Kryenegociator), ai që përfaqësonte Ministrinë e Mbrojtjes nga Forcat Detare, i shfaqur pas gjashtë vjetësh tek çelte një dritare të prishur… që për kujtesën e bashkësisë, ka një gjurmë të shënuar.

Emrin e këtij negociatori nuk e kam përmendur kurrë, por kur erdhi koha kam debatuar ballë për ballë, dhe ajo betejë nuk ka qenë asnjëherë personale. Kam paraqitur kundërshti në mënyrë të drejtpërdrejtë, më shumë se 130 shkrime e analiza, në disa media të shkruara shqiptare, si dhe intervista e debate në mediat pamore. Në një kohë të shkurtër, sapo Marrëveshja shkoi në Kushtetuese botova librin “Deti që nuk falet”, 320 faqe, duke qenë i hapur dhe në përgjegjësinë shkencore të studimit. Negociatori në fjalë, në hapësirën kohore prej gjashtë vjetësh është përfolur kaq shumë (jo nga unë) edhe pse qëndronte në grada të larta e funksione të cilat i mori pas mbrojtjes që i bëri marrëveshjes.

Dhe ja … bëri fësht… e doli në Ora News TV duke e drejtuar në mënyrë keqdashëse shënjestrën e tij të prishur ndaj një oponenti të pavarur, pa e nuhatur se kështu ia kish kthyer vetvetes.

Nuk e tha asnjë fjalë se beteja, e cila kish përfshirë një formacion shumë të gjerë intelektual, mbaroi në Gjykatën Kushtetuese, ku u dha gjykimi i epërm që e mbylli veprën famëkeqe.

Në fund të asaj beteje të turpshme ai pat deklaruar: “I dhamë më shumë det Greqisë se ka Flotë detare më të madhe!”

Ata që ishin të pranishëm, ia bënë “Ëh! Ëh!”

Kjo ishte njolla që s’shlyhet kurrë. Para saj, Berisha kish marrë kompasin në dorë, për ta ndihmuar njeriun që në detin e madh, kish zgjedhur një shkëmb detar strukjeje.

Kush ia rriti frymëzimin këtij njeriu që të dalë në opinion pikërisht në këtë kohë kur “vepra” është dëshmi reale se i ka prishur edhe më shumë marrëdhëniet midis fqinjëve?

Deklarata vjen në një vijë bashkuese të Athinës, së cilës i doli natyrshëm në kohë turbullirash negociatori i dikurshëm që të deklaronte, se shkaku origjinë është që një oponent i pavarur në manipulim të hartave “… ka dashur të krijojë një trekëndësh për t’u tallur me ndjenjat e njerëzve”. Sikur oponenti të kish aftësi sugjestioni. Konteksti ka lidhje me “nacionalizmat” ku negociatori kërkon transhe për t’u mbrojtur. A nuk foli kështu edhe Bakojanis, Berisha etj? Në të njëjtën fill.

Prej kësaj, del natyrshëm përfundimi se Kushtetuesja qenka molepsur nga ky sindrom…

Në të gjithë dokumentacionin e paraqitur në Kushtetuese, nuk ka asnjë dëshmi hartografike që t’i irritojë shqiptarët, çka është tanimë e vërtetueshme lehtësisht. Nuk ka asnjë hartë nga ato që paska ruajtur në sirtarin e tij negociatori.

Ka veç një dashamirësi ndaj detarit… që mund ta ruante sërish figurën e tij duke iu qasur atij realiteti që u prodhua nga shkaqe që ai vetë i di.

Ndërkaq Forca Detare ku ai ka shërbyer e komanduar, dhe opinione të kohëve të fundit (shikoni Kap. Meçollari, apo Kap.Petoshati) me urtësi dhe argumente për aq sa arrijnë të çmojnë, sjellin dyshime themelore për rolin e tij shumë të dukshëm duke anashkaluar FD.

Me naivitet (sërish më vjen keq tek e shpreh) kujton se gjithë kjo histori na qenka “e tija” dhe “e Oponentit”, kur ajo fitoi një tejdukshmëri aq të madhe, kombëtare, ndërkombëtare por edhe profesionale.

Del në pah, se brenda tij, negociatori ka një karakter tjetër… forca e të cilit e bën zap dhe nuk e lë të meditojë ndershmërisht me vetveten; është ajo, që në kahjen e keqe e kapërcen aktin e epërm të Kushtetueses, e cila nuk ka emrin e një Oponenti, por gjykimin më gjakftohtë juridik e shkencor që e hodhi poshtë atë Pakt Detgrabitës.

Prandaj ai lypsej të merrej ndershëm me argumentet që sjell Kushtetuesja, të cilat duhet t’i ketë lexuar, por ka gjasa se i kanë lënë një mbresë vërtetësie aq goditëse ndaj iu largohet dhe iu fshihet, si kurrë nuk duhet ta bëjë një kundëradmiral.

Teksa shprehem kështu, ndonëse ndodhem larg e nuk e kam parë hartën që ai shpjegon, them se “si vallë nuk i dridhet timoni i anijes dhe nuk i çrregullohet busulla në orientimin e saj, kur kalon lehtësisht tek shkëmbi i Pleshtit (Barketa) ku ai braktis të vërtetën shqiptare historike të “pushtimit” të këtij shkëmbi, ku u vendos kompasi i baraslargësisë dhe deri në vijën bazore të gjirit të Tetranisit na ngelën afërsisht 780 metra?

Si nuk i dridhet timoni, teksa dëgjon kumtin “qorr” të baraslargësisë që e hedhin në hartë fqinjët dhe shmang metodën tjetër “equitable solution” që e rekomandon UNCLOS, për rrethanat aq komplekse që i ka kufiri ynë detar me Greqinë dhe rri në atë “paqen me veten”?

Sa ka të tilla për të thënë, por këtu s’është vendi.

Mbajtja ende në dorë e kompasit politik, duke përmendur Lulzim Bashën që ishte në krye të Ekipit të “përkushtuar” çka sollën atë ngjarje unikale në dramën e kufijve tanë historikë, është një dimension tjetër i turpshëm që lë jo vetëm shije të keqe, por dhe një damkë që shndërrohet sërish në boomerang.

Kristaq Gerveni (është hera e parë që po e përmend në shkrimet e mija kritike-teknike) ndodhet tani në paqe me veten…! A nuk ju duket groteske!?

Ai pret që të bëhen rinegociata dhe ekipi i ri “të përfitojë më shumë se sa mori ai…”.

Për të gjithë shoqërinë, kjo duhet të jetë dëshpëruese.

Aq më shumë me organizimin e shtetit dhe funksionimin e tij, se siç shihet fjala u ka ngelur atyre që e ndërtuan atë Pakt, të riflasin dhe riargumentojnë dështimin e madh, kur Institucionet e Shtetit s’e kanë thënë ende gjysmë fjale, veçse kanë kallëzuar në prokurori negociatorët, pas gjashtë vjetësh…

Ish-negociatori Gërveni: S’i kemi falur asnjë metër katror det Greqisë, duhet rinegociuar

Në një kohë që është rindezur debati midis Shqipërisë dhe Greqisë për nënshkrimin e një marrëveshjeje të re për kufirin detar, i akuzuari kryesor për paktin e kufirit detar me Greqinë thotë se e ka shpirtin në paqe.

Anëtari i grupit negociator mohon se në marrëveshjen me shtetin helen, t’i jetë falur qoftë edhe një metër det Greqisë.

“Nuk është falur asnjë metër. Ne mendojmë kemi bërë më të mirën dhe kemi marrë aq sa na takon. Vërejtjet që ishin, ishin përgjithësisht ndaj ligjit të detit, ai ligj i detit është ratifikuar nga Parlamenti shqiptar. Nëqoftëse ka vërejtje për atë, le ti kërkohet Parlamentit që të heqë ratifikimin e atij ligji. Zoti. Myslim Pasha që është topograf, për të justifikuar atë çfarë kishte ngatërruar në shkrimet e para nxjerr lloj-lloj hartash.

Nëse vini re këtu (tregon hartën), me ngjyrë të kaltër është vija e koordinatave që kemi përcaktuar ne deri te pika 150. Nga pika 125, këtu i ka bërë me qëllim të keq, spostim të vijës së kufirit që kemi vënë ne. Është spostuar 19.7 km dhe i është afruar 22 km bregut tonë, kur në fakt është 39.8 km larg. Këtu ai ka dashur të krijojë një trekëndësh për tu tallur me ndjenjat e njerëzve. Jam shumë në paqe, nuk kam ndonjë mizë në kësulë, besoj tek e vërteta dhe do kem durim të pres”, thotë ai.

Megjithatë, në një intervistë për Ora News, Gerveni pranon se marrëveshja e detit duhet rinegociuar.

“Pres që të bëhet rinegociimi dhe ndoshta ekipi tjetër që do të caktohet do të marrë më shumë. Ne mendojmë se kemi marrë aq sa na takon. Nëse ndonjë ekip tjetër do të marrë më shumë, edhe unë do të lumturohem si shqiptar”. Në vitin 2009, Shqipëria dhe Greqia nënshkruan marrëveshjen për kufirin detar, e cila një vit më vonë u shpall antikushtetutese nga Gjykata Kushtetuese. Opozita e atëhershme, sot ne qeveri çoi çështjen në Kushtetuese me akuzën se Greqisë iu falën 340 km katrorë hapësirë detare”, thekson Gerveni.