Ruçi: Veliaj ka vizionin për të ndryshuar Tiranën, qytetarët do ia shohin punën

Kryetari i Grupit Parlamentar të Partisë Socialiste, Gramoz Ruçi, e ka vlerësuar emrin e Erion Veliaj si kandidaturën më të mirë për kryetar të bashkisë së Tiranës, duke theksuar se ai ka vizionin e duhur, energjinë dhe aftësinë për të bërë për më të mirën për kryeqytetin dhe qytetarët e tij.

Në intervistën e djeshme për gazetaren Eni Vasili, në News 24, Ruçi tha se ai personalisht e ka pritur shumë mirë kandidimin e Veliajt në Tiranë. “E kam pritur mirë prezencën e z.Veliaj në strukturën tonë politike dhe kandidimin e tij si kryetar bashkie. Jam i bindur se me energjinë që ka, vizionin dhe ambicien e tij, qytetarët e Tiranës do të kenë besim të plotë dhe do ia shikojnë produktin e punës që ai paraqet me programin dhe realizimin e tyre në katër vitet e ardhshme”, tha Ruçi.

Më tej ai theksoi se Veliaj me punën e tij në krye të Ministrisë së Mirëqënies Sociale dhe Rinisë dha provën se ka jo vetëm ambicien, por edhe energjinë për të bërë punë të mira dhe për të thyer çdo mosbesim. “Ai mori një ministri që nuk ishte ndier ndonjëherë në 22 vjet dhe e solli në dritë me reformat që bëri aty, duke filluar nga reforma e pensioneve, nga qëndrimi i zbatueshmërisë së ligjit për ish të përndjekurit, për shtresat në nevojë, për ata që merrnin asistencë sociale, e deri te hapat që kjo Ministri hodhi për zyrat e punës, apo arsimin profesional”, deklaroi Ruçi.

Ai ka vlerësuar edhe faktin se si një njeri, vetëm me ambicien e tij personale dhe pa përkrahjen e askujt, mund të eci përpara dhe të drejtojë edhe institucione shumë të rëndësishme në vend. “Erion Veliaj është një njeri me ambicje. Këtu ku është, nuk ka ardhur as për hatër të emrit të babait apo të xhaxhait. Unë do ta merrja atë djalë si simbol të disa gjërave, do ta shikoja se si të jesh jetim dhe ta përballosh jetën me punë dhe si të jesh fukara dhe të kesh dashuri për arsimin dhe mund të shkollohesh në shkollat më të mira”, theksoi Ruçi.