Shefi i Bayern Munich Karl-Heinz Rummenigge thotë se Carlo Ancelotti nuk përmbushi pritshmëritë e klubit këtë sezon.
Trajneri italian është shkarkuar nga kampionët gjermanë, pas humbjes 3-0 ndaj Paris Saint-Germain mbrëmjen e kaluar në Champions League.
“Paraqitja e ekipit që prej startit të sezonit nuk përmbushi pritshmëritë që i kishim vendosur,” shprehet Rummenigge nëpërmjet faqes zyrtare të klubit.
“Ndeshja ndaj PSG tregoi qartë se duhet të merreshin masa. Këtë gjë i kemi thënë Ancelotti-t unë dhe Hasan Salihamidzic në një bisedë të hapur dhe serioze sot ku i përcollëm edhe vendimin tonë.
Carlo është miku im dhe do të mbetet, por duhet ta merrnim këtë vendim për të mirën e Bayern Munich.
Tani pres një zhvillim pozitiv dhe paraqitje me standard të lartë nga ekipi në mënyrë që mund të arrijmë objektivat tonë”, përfundoi Rummenigge.