Kundër Fiorentinës është ndeshja e dytë e së vërtetës për trajnerin e Milanit, Klarens Sedorf, pas ultimatumit që i është vendosur nga shoqëria, megjithatë përballja me vjollcët nuk përcjell aspak nervozizëm te trajneri i kuqezinjve. “Kam një filozofi jete që më mundëson t’i jetoj në ekuilibër të plotë momentet e stresit. Është e qartë që nuk më përcjell kënaqësi të jetuarit e këtyre momenteve të vështira, por pavarësisht kësaj jetesa ime nuk ndryshon. Impenjimi në punë nuk do të më mungojë kurrë”, thotë trajneri. Pyetjes së gazetarëve për tensionin midis tij dhe Galianit, Sedorf iu përgjigj: “Tensioni midis meje dhe Galianit nuk ka ekzistuar kurrë. Ndikimet nga jashtë të bëjnë të mendosh shumë gjëra, por unë dhe Galiani kemi punuar gjithmonë për të mirën e Milanit dhe do vazhdojmë ta bëjmë këtë gjë”. Holandezi më pas u përqendrua te kundërshtari i radhës: “Është një skuadër që u pëlqen të gjithëve për mënyrën e lojës. Fiorentina ka ekip kompakt dhe në sulm ka lojtarë që mund të bëjnë diferencën. Me pak fjalë, është një skuadër që duhen respektuar në maksimum”. Në fund të intervistës, ish-futbollisti theksoi se gjendja e skuadrës së tij pas barazimit 1-1 me Lacion është e mirë. Seedorf shtoi se ndaj bardhekaltërve i pëlqeu mbrojta dhe tha se Mekses, Rami e Konstant me shumë mundësi do të luajnë edhe në Firence.