Sektori i ndërtimit shfaqi disa shenja përmirësimi në tremujorin e fundit të vitit kaluar. Pas të dhënave të vlerës së shtuar bruto që treguan një rritje të sektorit me 3.7%, sinjale pozitive vijnë edhe nga lejet e ndërtimit. Sipas INSTAT, në tremujorin e katër të vitit 2013, në Shqipëri u dhanë gjithsej 210 leje ndërtimi. Kjo shifër është më e lartë se të tre tremujorët e mëparshëm të marrë së bashku dhe afërsisht tre herë më e lartë krahasuar me tremujorin e fundit të vitit 2012.
Përcaktues në këtë rezultat ka qënë rikthimi i lejeve të ndërtimit në qarkun e Tiranës. Në tremujorin e fundit në qarkun Tiranë u dhanë 79 leje ndërtimi, nga gjithsej tetë leje që ishin dhënë për nëntë muajt e parë. Miratimi i planeve rregulluese ka zhbllokuar dhënien e lejeve në njësinë më të rëndësishme, Bashkinë Tiranë, çka duket se i ka dhënë një hov projekteve të reja të ndërtimit. Rritje të numrit të lejeve pati edhe në qarkun e Durrësit, ku në tre muajt e fundit të vitit të kaluar u dhanë 77 leje, nga 14 leje gjithsej që ishin dhënë më parë gjatë vitit.
Kthimi i ndërtimeve në dy qarqet me përqëndrimin kryesor të kërkesës për pasuri të paluajtshme duket se mund t’i japë një shkundje tregut që po përjeton një krizë disavjeçare. Sipas Instat, vlera e ndërtimeve të miratuara në tremujorin e fundit të vitit të kaluar ishte 16.7 miliardë lekë, 83% më shumë krahasuar me të njëjtën periudhë të vitit të mëparshëm.