Prishtinë, 12 nëntor – Kosovës do t’i kontestohet sovraniteti dhe funksionaliteti i brendshëm i shtetit prej Serbisë nëse shtetet perëndimore nuk i bëjnë presion Qeverisë serbe që ta njohë shtetin e pavarur të Kosovës, thuhet në dokumentin ende të papërfunduar “Kosova dhe Marrëveshja Prishtinë-Beograd”, të grupit të pavarur të mendimit, “Democratization Policy Council” (Këshilli i Politikave për Demokratizim”), shkruan sot “Koha Ditore”. Serbia dhe Kosova kanë arritur në prill të këtij viti marrëveshje me ndërmjetësimin e Bashkimit Evropian për normalizimin e mardhënieve, megjithëse Beogradi nuk e njeh shtetësinë e Kosovës, shkruan kjo gazetë.
“Këshilli i Politikave për Demokratizim” vlerëson se zhvillimet në terren pas marrëveshjes së ndërmjetësuar prej Politikës së Jashtme të Bashkimit Evropian, Catherine Ashton, siç shkruan “Koha ditore”, paralajmëron se procesi ka arritur në pikën, në të cilën kërcënon funksionalitetin e fituar me vështirësi të shtetit të Kosovës, integrimit paqësor të shumicës së serbëve të Kosovës, si dhe “vazhdimin në përjetësi të mosmarrëveshjeve me Serbinë mbi statusin”. /Koha.net