Shalsi: Dështimi në sektorin energjetik, tjetër arsye për të mos votuar Berishën

Dështimi në sektorin e energjisë është një tjetër arsye për të cilën nuk duhet votuar Berisha, sipas PS. Në një konferencë shtypi, deputeti socialist, Eduard Shalsi, tha se gjatë tetë viteve në pushtet, qeveria e ka rritur çmimin e energjisë me 80 për qind, ndërsa Berisha vijon të flasë për Shqipërinë superfuqi energjetike në rajon.

“Asnjë strategji e mirëfilltë, asnjë program i detajuar, asnjë plan serioz nuk ekziston për këtë sektor të rëndësishëm. Asgjë, përveçse deklaratave të papërgjegjshme të Sali Berishës për Shqipërinë si superfuqi në fushën energjetike apo ideve të çartura të tij si ndërtimi i centralit bërthamor në Shkodër. Ndërkohë që, familjeve shqiptare u duhet të paguajnë fatura të cilat janë gjithnjë e më të shtrenjta, gjithnjë e më të papërballueshme për buxhetet e tyre të brishta. Çmimi i 1kv/h është rritur me 80% në këto 8 vite të keqqeverisjes Berisha, në 2005 ishte 50 lek për kv/h, sot në 2013 është 90 lek për kv/h”, tha Shalsi gjatë fjalës së tij.

Deputetit socialist u ndal në dështimin e CEZ-it dhe koncesionet joefektive. “Humbjet në rrjet jo vetëm që nuk janë ulur, por përkundrazi ato janë kanë kaluar në nivele të paimagjinueshme, 50% në vitin 2012. Abuzimet me faturat aforfe si dhe mbifaturimet kanë qenë në nivele skandaloze. Edhe pse janë dhënë me koncesion mbi 300 HEC-e, vetëm një  numër shumë i vogël i tyre janë në prodhim duke ndikuar shumë pak në plotësimin e nevojave për energji.

Por Shqiptarët duhet të dinë që tashmë paguajnë edhe koston-barrë të marrëveshjes që qeveria e Berishës bëri me CEZ-in, para se ta largonte kompaninë, vendosi uljen e çmimit me të cilin KESH ia shiste CEZ-it energjinë”, u shpreh deputeti socialist.