Kuvendi shkarkon Zana Xhukën, Shkëlqim Ganaj në krye të ILDKP

Kuvendi miratoi me 76 vota pro dhe një abstenim pr/vendimin “Për konstatimin e pavlefshmërisë absolute të vendimit të Kuvendit nr.1/2013 për Inspektoren e Përgjithshme të Inspektoriatit të Lartë të Deklarimit dhe Kontrollit të Pasurive, Zana Xhuka.

Më pas Kuvendi përmes votimit të fshehtë votoi dy kandidaturat e propozuara një vit më parë nga Presidenti i Republikës, Zana Xhukën dhe Shkëlqim Ganaj, ku ky i fundit mori 75 vota votat e maxhorancës duke u zgjedhur në krye të ILDKP-së.

 Kush është Shkëlqim Ganaj, njeriu që do kontrollojë xhepat e politikanëve

Shkëlqim Ganaj, kryetari i ri i Inspektoratit të Deklarimit dhe Kontrollit të Pasurive, është një jurist 43-vjeçar, me një eksperiencë mbi 20-vjeçare në administratën e shtetit, kryesisht në sistemin e drejtësisë. I lindur më 10 maj të vitit 1970, kreu i ri i ILDKP-së nuk është një i “huaj” për këtë institucion pasi ka punuar prej vitit 2004.

CV-ja profesionale e Shkëlqim Ganajt është mjaft e pasur. Ai e ka nisur karrierën si gjyqtar i Gjykatës së Elbasanit, sapo përfundoi studimet në Fakultetin e Drejtësisë, në Universitetin e Tiranës. Është diplomuar në vitin 1992 dhe në 1993 emërohet gjyqtar në Elbasan.

Pas një përvojë të shkurtër në gjykatë, emërohet po në vitin 1993 në Prokurorinë e Elbasanit në pozicionin e hetuesit. Dy vjet më pas, emërohet prokuror në organin e akuzës së rrethit të Elbasanit, ku punon deri në vitin 1995. Në këtë vit, Shkëlqim Ganaj transferohet në Prokurorinë e Rrethit Gjyqësor Tiranë në detyrën e Prokurorit, post që e mban deri në vitin 2003.

Në korrik të vitit 2003, Ganaj emërohet përgjegjës sektori i në Zyrën e Regjistrimit të Pasurive të Paluajtshme të Tiranës, ku punon për mbi një vit. Në maj të viti 2004 emërohet në institucionin e sapo krijuar, Inspektoratin e Deklarimit dhe Kontrollit të Pasurive(ILDKP), post që e ka mbajtur deri më sot.

Një vit më parë, më 2013, Presidenti i Republikës propozon Shkëlqim Ganajn dhe Zana Xhukën si kandidatura për kreun e ILDKP-së, që do të duhej të votoheshin nga Kuvendi.

Por, në seancën e 16 janarit 2013, mazhoranca e atëhershme, e përfaqësuar nga Partia Demokratike, hodhi për votim vetëm kandidaturën e Xhukës, duke e zgjedhur atë në krye të këtij institucioni.

Ditën e djeshme, Kuvendi inicioi nismën për shkarkimin nga detyra të Xhukës, ku ndër të tjera argumentoi se zgjedhja e saj nga parlamenti ishte bërë në mënyrë të paligjshme. Parlamenti miratoi shkarkimin e Zana Xhukës, ndërkohë me 75 vota pro vendosi emërimin e Shkëlqim Ganajt në postin e kreut të ILDKP-së.

Debate për Zana Xhukën, Berisha-Metës: Jeni parti e dezintegrimit

Seanca e sotme parlamentare ka nisur me debate mes deputetëve të opozitës dhe atyre të maxhorancës për shkak të futjes në rendin e ditës të kërkesës së Komisionit të Ligjit për shkarkimin e kreut të ILDKP-së, Zana Xhuka.

Në nisje të seancës, kreu i grupit parlamentar demokrat, Edi Paloka, tha se “futja në rend të ditës e këtij akti antikushtetues është shumë e rëndë. Është shkelur rregullorja dhe ju e dini shumë mirë, por këtë e bëni me qëllim”.

Ndërsa ish-kryetari Berisha tha se shkarkimi i Zana xhukës është hakmarrje personale e kryeministrit Rama, ndërsa akuzoi kreun e Kuvendit, Meta, se  po shkel rregullat e parlamentarizmit.

“Po e përdor Parlamentin sikur të ishte kopshti yt dhe i Edi Ramës. Ju fusni jashtë çdo rregulli në rendin e ditës shkarkimin e paligjshëm të një zyrtari të lartë të kontrollit të pasurive.

Rama është tërbuar me zonjën vetëm për faktin se ajo guxoi të dërgonte një letër zonjës Basha dhe Ramës, për t’u paraqitur për sqarime rreth pasurisë.

Përgjigja e tij ishte vërsulja me tërbim sapo erdhi në pushtet. Historia e turpit është edhe e juaja zoti bashkëkryetar. Ky nuk mund të quhet më Parlament.

(i drejtohet Metës) Ky është një turp. Çdo ditë e më shumë faktoni se jeni parti e dezintegrimit derisa pranoni gjë të tilla. Ju po sakrifikoni statusin e vendit kandidat. Ju keni interes paratë dhe pasuritë e krimit që vidhni çdo ditë.

A e dini ju se ç’do të thotë mosmarrja e statusit, apo doni të mbetet pengu i juaj dhe Edi Ramës. Ju them unë, në BE nuk ka asnjë qëndrim armiqësor ndaj nesh. Ata kërkojnë standarde”, tha Berisha.

Ndërsa kreu i Kuvendit, në përgjigjen e tij, theksoi se kandidatura e Zana Xhukës për kreun e ILDKP-së ka qenë në kundërshtim me ligjin që në krye të herës.

“ Këtu vërtet ka ndodhur një problem i madh, kur pikërisht në seancë kur do të votohej për dekretin e presidentit (kur u propozua emri i Xhukës) është votuar për një kandidaturë dhe Kuvendi nuk është shprehur për tjetrën. Kjo kandidaturë është në kundërshtim me ligjin dhe këtë ua kam thënë edhe kur kam qenë në koalicion me ju”.