Shkarkohen 70 sekretarët, ministri Naço: Reformim i sistemit

Gjykatat përfshihen nga reforma, ikin 70 sekretarët e institucionit në rrethe. Ligji për Gjykatën Administrative ka diktuar si të pashmangshëm edhe riorganizimin e sistemit të drejtësisë. Ministri i Drejtësisë, Nasip Naço, ka sqaruar dje edhe arsyen e largimit nga puna të 70 sekretarëve gjyqësorë në të gjitha gjykatat e vendit, duke mohuar se kjo është një fushatë ndaj gjyqësorit, por e cilësoi si një reformë të domosdoshme. Gjatë një prononcimi për mediat, kreu i Drejtësisë bëri të ditur se këto largime janë pjesë e reformës që ka nisur në sistemin e drejtësisë, pjesë e të cilës është edhe fillimi nga puna e gjykatës Administrative.

“Në 4 nëntor ka nisur nga puna Gjykata Administrative, duke nisur kështu procesin e një riorganizimi të sistemit gjyqësor në Shqipëri. Është caktuar numri i përgjithshëm i gjyqtarëve dhe punonjësve, duke zbatuar edhe parashikimet e buxhetit të vitit 2013, si dhe nëpërmjet konkurrimit janë plotësuar vendeve vakante. Pjesa tjetër, pra sekretarëve gjyqësor të larguar nga puna, ka ardhur pikërisht si rrjedhojë e këtij reformimi të sistemit të drejtësisë, në përputhje me ligjin, duke zbatuar me korrektësi kodin e punës”, theksoi Naço. Ministri ka theksuar herë pas here në takimet e zhvilluara se reforma në drejtësi është e nevojshme, në mënyrë që të jepen edhe rezultatet e kërkuara nga partnerët ndërkombëtarë dhe plotësuar kushtet e vendosura nga BE për statusin, negociatat dhe më tej integrimin në këtë union. Për këtë shkak u ndërmorën edhe disa ndryshime në Kodin e Procedurës Penale, u ngrit Gjykata Administrative, do të ngrihet Byroja e Hetimit, pasi sfidat e radhës sipas ministrit, janë “lufta ndaj korrupsionit deri në nivel zyrtar, krimit të organizuar, trafiqeve dhe pastrimit të parave”. Gjatë javës së shkuar, burime të Ministrisë së Drejtësisë, bën të ditur se është firmosur shkarkimi nga puna i të paktën 70 sekretarëve gjyqësorë në të gjitha institucionet në rrethe. Por referuar buxhetit dhe reformës në kuadër të ngritjes së Gjykatës Administrative, sipas ministrit Naço, kjo iniciativë ishte e nevojshme.