Në Shqipëri nuk ka shumë kuptim të flitet për të majtë ose të djathtë. E majta dhe e djathta kanë vlerë operacionale, si koncepte, kur zbatohen në kushtet e një demokracie pluraliste, përndryshe si kategori aplikative mund të krijojnë probleme, më shumë sesa t’i zgjidhin. Tipare si arbitrariteti, dhuna shtetërore, imponimi me forcë si formë mbizotëruese e çdo transaksioni social, mungesa e lirive themelore dhe e demokracisë, terrori policor, shpërfillja e vullnetit të individit, armiqësia ndaj tregut dhe kulturës tregtare etj., nuk mund të konsiderohen as të majta as të djathta, por thjesht totalitare.
Shndërrimi i përkatësisë partiake në një kriter përkufizues të individit, nuk është as i majtë as i djathtë, është thjesht nevojë e regjimeve vrasëse si ky i sotmi në Shqipëri për të mbajtur veten në këmbë sa të munden e si të munden. Edhe rindarja e shoqërisë shqiptare në klasa, shpërndarja e privilegjeve materiale sipas kutit “ky flet mirë për Partinë dhe udhëheqësin”, “ky flet keq”, nuk është as e majtë as e djathtë por është dhunë dhe tipar i shoqërive të dominuara nga sklerotikë psikopatë që nuk ngopen me pushtet politik dhe konformistë e interesaxhinj që përfitojnë rreth e rrotull. Ndaj nuk ka gjë më debile se të përmendësh “i majtë” apo “i djathtë” nëse është fjala për PD-në dhe Berishën.
Email nga adresa: [email protected]