Shoqëria civile shqiptare i dërgon një letër kreut të OKB-së, ku shpreh indinjatën e thellë për shpërdorimin e postit të presidentit të Asamblesë së Kombeve të Bashkuara nga Vuk Jeremiç. Reagimi lidhet me koncertin e organizuar në 14 janar në OKB, ku në vend të himnit të paqes u interpretua pjesa muzikore “Marshim mbi Drin”, e cila ka shërbyer si himn ushtarëve serbë gjatë masakrave në Bosnje dhe që shoqërohej pikërisht me imazhe nga rrethimi dhe masakrat në Srebrenicë. Shoqëria civile shqiptare e cilëson këtë “akt të shëmtuar dhe fyes jo vetëm për popullin martir të Bosnjës dhe Hercegovinës, por të gjithë popujt e tjerë të Ballkanit, të cilët ishin viktima të luftërave të përgjakshme nga forcat serbe gjatë procesit të vështirë të shpërbërjes së ish-Jugosllavisë, e cila kulmoi me genocidin në Srebrenicë, krime këto që janë kryer pikërisht nën meloditë e “Marshi mbi Drin”. Ky akt i pashembullt, i cili në realitet fyen tërë botën, krijon një njollë të rëndë në Organizatën e Kombeve të Bashkuara. Ajo na zemëron edhe më tej, kur në vend që të kërkonte falje publikisht për këtë akt pështirë, i cila është e vështirë që të pranohet edhe për popullin serb, z Jeremiç, si një fanatik i përkushtuar ideve nacionaliste të Milosheviçit, vazhdon të refuzojë të marrë përgjegjësi”, thuhet në letër.
Në letër përmendet edhe një deklaratë e kësaj natyre, të cilën Jeremiç e ka bërë në nisje të detyrës së tij si kryetar I Asamblesë së Përgjithshme. “Akti i zotit Jeremiç është vijim i deklaratave të tij famëkeqe, në kohën kur sapo mori detyrën si kryetar i Asamblesë së Përgjithshme. Në një keqpërdorim flagrant dhe mosrespektim të mandatit të tij z. Jeremiç do të shpallte se: “Për sa kohë Serbia kryeson OKB-në, anëtarësimi i Kosovës në OKB, do të ndodhë vetëm kur të kalohet mbi kufomën time”. Në vend që të linte mënjanë retorikën nacionaliste dhe të dhunshme, Jeremiç përforcoi bindshëm idenë se ai ishte krenar të përfaqësonte linjën me agresive të nacionalizmit dhe mendimet e zeza që mbizotërojnë ende në disa qarqe politike në Serbi”.
Shoqëria civile thekson në letër se ndërkohë që krimet e serbëve janë ende të gjalla, kur shumë kriminelë rezultojnë të lirë e qindra njerëz të zhdukur dhe qeveria serbe nuk ka kërkuar ende falje,është e papranueshme që Jeremiç të vazhdojë të promovojë krimet nga zyra e presidentit të asamblesë së OKB-së.
Cna ka gjet me shoqerine civile shqiptare.Para kesaj letre duhet te kishin shkruajtuar me dhjetra letra per ngjarjet qe po ndodhin para surratit te tyre.Shoqeri civile inekziztente.