Anëtari i KLD-së dhe disa detaje mbi linjën e drogës Turqi-Shqipëri

Është konsideruar si një nga vendimet më skandaloze të drejtësisë shqiptare dhe ka shkaktuar edhe një krisje të raporteve diplomatike më Gjermaninë. Në emrat e gjykatësve që e kanë marrë këtë vendim, shihet sërish ai i Gjin Gjonit, sot, një nga anëtarët e KLD-së. Vendimi ka të bëjë me një shtetas turk të shumë-kërkuar për trafik ndërkombëtar droge Abdulselam Turgut, i cili u la i lirë nga Gjykata e Apelit në Tiranë, dhe mnjëherë u zhduk nga banesa e tij pa adresë.

I arrestuar në Rinas më 18 shkurt të vitit të shkuar për llogari të drejtësisë gjermane, ai doli nga burgu fal një vendimi skandaloz të marrë nga tri gjykatës: Gjin Gjoni, Hysni Demiraj dhe Agron Papajani, të cilët kanë vendosur “ndryshimin e vendimit të Gjykatës së Tiranës, duke ndryshuar masën e sigurimit nga ‘arrest në burg’ në ‘arrest shtëpie’, në godinën e ndodhur në ‘Kthesën e Kamzës’.”

Vendimi i gjykatës është shumë i thatë dhe në të nuk parashikohej nëse kjo “godinë”, e cila nuk kishte as numër, dhe as adresë të saktë, duhet të survejohet nga Policia e Shtetit. Sapo la qelinë Turgut u largua dhe nuk u gjend më.

Linja e drogës dhe Policia shqiptare

Arrestimi i 44-vjeçarit turk, që u kërkua për llogari të drejtësisë gjermane, u krye asokohe në një heshtje të plotë nga ana e policisë shqiptare. Dyshimet pse policia e mbajti sekret arrestimin e trafikantit turk duket se lidheshin me njerëz të fuqishëm në Policinë e Shtetit, që kanë kontrollin mbi këtë linjë të trafikut të drogës.

Shërbimet e inteligjencës perëndimore hetuan lidhjet e këtij grupi shqiptarësh me një nga ish-drejtuesit më të rëndësishëm të Policisë së Shtetit, i cili urdhëroi mbajtjen në heshtje të arrestimit të këtij shtetasi turk në Rinas. Dhe treshja e Apelit mes të cilëve Gjoni bëri pjesën tjetër të “punës”. Asokohe u shkrua se nëse hetohej kjo linjë trafiku, mund të zbardheshin dhe disa enigma që lidhen me disa kurthe, në të cilat ka rënë policia shqiptare, kur në një rast u morën dhe katër jetë policësh.

Gjermania përgatiti një notë proteste ndaj lirimit të trafikantit turk. Në rrugë jozyrtare, reagimi i autoriteteve gjermane ka qenë mjaft shqetësues, ku rrezikohej bashkëpunimi në të ardhëm i drejtësisë shqiptare dhe asaj gjermane, ndërsa nuk përjashtoheshin as masat më të ashpra për këtë vendim skandaloz.

Si e “argumentoi” Gjoni lirimin

Vendimi në fjalë është marrë në kundërshtim të plotë me ligjin dhe jashtë kuadrit të provave që ndodheshin në dosjen e trafikantit turk. “Masa e sigurimit me afat 40-ditor e përzgjedhur nga gjykata është tejet ekstreme dhe nuk i përgjigjet rëndësisë së faktit. I arrestuari është vendosur nën masë sigurimi për efekt ekstradimi në Gjermani. Nuk ka kërkesë për ekstradim, por ka vetëm një kërkesë për masë shtrënguese. Të arrestuarit i janë marrë dokumentet, ai nuk ka rrezik ikjeje, pasi ka lëvizur gjithmonë lirisht brenda shtetit turk dhe ai është i sëmurë, ka një kontratë qiraje me shtetas shqiptarë, ka një biznes të rregullt, është familjar.” – shkruante në vendim Gjoni dhe kolegët e tij

Por “familjari me biznes të rregullt” që “nuk kishte rrezik ikjeje”, u zhduk sapo doli nga dera e Gjykatës.

Mësohet se turku i arrestuar atë kohë në Shqipëri ka përdorur disa linja për dërgimin e heroinës në vendet perëndimore. Pikënisja e të gjitha linjave është vendlindja e Turgut, Turqia. Më pas fillon e ashtuquajtura linja e “Ballkanit”. Droga përpunohet dhe paketohet në Turqi, niset në Greqi, kalon në Shqipëri e përfundon në Itali. Ndërkohë, linja e “qendrës” niset sërish nga Turqia, shkon në Bullgari, Maqedoni, Serbi, Mali i Zi, Bosnja, Kroaci, Slloveni dhe përfundon sërish në Itali ose Austri. Ndërsa linja e “veriut” niset nga Turqia, kalon në Bullgari e Rumani për të përfunduar në Austri, Hungari, Çeki, Poloni dhe përfundon në destinacion në Gjermani.

Turgut dhe një shkrim në median turke

Abdulselam Turgut përmendet si emër edhe në shtypin turk, në një operacion antidrogë të kryer në këtë vend. Sipas shtypit turk, Abdulselam Turgut është mes pesë emrave të tjerë, ku ka edhe shtetas shqiptarë, që sipas shtypit turk kishin bërë plane të fusnin një ngarkesë heroine edhe në Shqipëri, nëpërmjet një mjeti të ngarkuar me patate. Por ky plan ka dështuar pas arrestimit të një futbollisti, i cili u kap me 30 kilogramë heroinë.

Linku i lajmit i gazetës Hyrriet, që lidh këtë emër me disa shqiptarë të akuzuar për trafik droge në Turqi është: http://arama.hurriyet.com.tr/arsivneës.aspx?id=-50797

Aty shkruhet se një futbollist i Fenerbahçes me origjinë shqiptare, Ismail Çira është arrestuar nën akuzën e trafikut të drogës. Gjykata ka kërkuar deri në 30 vjet burg për shkak të pozitës që Çira ka pasur në trafikun e drogës. Në një rast tjetër në Stamboll janë arrestuar si bashkëpunëtorë të Çirës Musa Qazim Ay, Xhemail Pasmaçiu, Hekuran Hoxha, Fatmir Sofia dhe Abdulselam Turgut, të cilët po gjykohen të burgosur.

Më tej artikulli i Hyrriet shpjegon se si futbollisti Çira erdhi në Turqi dhe si u përfshi në trafikun e drogës.

Shqetësim për gjyqësorin shqiptar

Avokati i të akuzuarit për trafik droge ishte një nga avokatët e njohur që merret dhe me çështje politike në Shqipëri. Ai mbrojti ministrin Fatmir Mediu, të akuzuar për tragjedinë e Gërdecit dhe ka mundur të mbrojë atë me imunitet. Siç dihet, çështja Mehdiu lidhet ngushtësisht me çështjen që rrethon përfshirjen e djalit të kryeministrit në atë biznes.

Nga ana tjetër, burime nga Prokuroria e Përgjithshme thanë se ky nuk është rasti i vetëm që shtete të huaja shqetësohen për vendimet e gjyqësorit shqiptar. Pak javë para këtij vendimi skandaloz të Gjonit dhe kolegëve, Gjykata e Krimeve të Rënda në Tiranë ka marrë një vendim të ngjashëm për tre shtetas të huaj të kapur me një ngarkesë prej 40 kilogramë heroinë, e cila ishte ngarkesa më e madhe e sekuestruar ndonjëherë në Shqipëri.