“Skrapi” prangos tatimorin në korrupsionin me 600 mijë lekë, 3 inspektorë të tjerë nën hetim

Inspektori i Hetimit Tatimor në Rajonin e Jugut u arrestua mbrëmjen e djeshme nga policia e Gjirokastrës nën akuzën e korrupsionit. Sektori Kundër Krimit Ekonomik e Financiar njoftoi se realizoi operacionin e koduar “Skrapi”, duke arrestuar në kushtet e flagrancës të dyshuarin Marion Hasanaj, 35 vjeç, banues në Gjirokastër, inspektor tatimor. Kurse në gjendje të lirë u proceduan edhe 3 inspektorë të tjerë të Hetimit Tatimor për Rajonin e Jugut, T. B., F. Sh., e F. Q., ku për arsye hetimi nuk u publikuan të plota identitetet e tyre. Burime zyrtare të policisë sqaruan se zyrtari Marion Hasanaj, është arrestuar në flagrancë gjatë operacionit ku u përdorën edhe metodat speciale të hetimit, duke i marrë shumën prej 60 mijë mijë lekësh pronarit të një firme të skrapit në Gjirokastër, në këmbim të mos vënies gjobë për mungesë të dokumentacionit të firmës. Mësohet se Hasanaj dhe tre kolegët e tij mbaheshin nën vëzhgim pas sinjaleve se shkonin subjekt me subjekt dhe pasi i konstatonin me shkelje të rënda, u kërkonin ryshfete të ndryshme në mënyrë që të mos u vendosnin gjoba që shkonin në dhjetëfish të asaj që u kërkohej për të paguar nën dorë. Policia tha se paratë janë kapur brenda në makinën ku udhëtonin 4 zyrtarët tatimorë të rajonit dhe vetëm pak minuta pasi kishin marrë ryshfetin. Akuzat ndaj tyre janë “korrupsioni pasiv i zyrtarëve që ushtrojnë funksione publike”. Dosja penale i kaloi ditën e djeshme prokurorisë vendore.