Rreth 45,8 milionë persona jetojnë në skllavëri moderne në të gjithë botën, sipas “Global Slavery Index” e organizatës australiane “Walk Free”, që u publikua sot.
“Rreth 1,243 milionë persona jetojnë në skllavëri në Evropë”, sipas këtij raporti.
India ishte në krye të këtij klasifikimi me 18,4 milionë persona në skllavëri, ndërsa Evropa ishte në fund.
Sipas Indeksit, Holanda ishte i vetmi vend që ishte klasifikuar me notën “A”.
Austria, Britania e Madhe, Suedia, Portugalia, Kroacia, Spanja, Belgjika dhe Norvegjia të gjithë kanë marrë vlerësimin e dytë më të mirë “BBB”.
Megjithatë, “Walk Free” thekson se “pavarësisht që Evropa ka një rankim të ulët, vazhdon të mbetet një rajon ku burrat, gratë dhe fëmijët shfrytëzohen seksualisht ose në punë të detyruar”.
”Fluksi aktual i refugjatëve në Evropë i ka vënë masat e sigurisë nën një presion të lartë”, tha organizata, duke shtuar se kjo ka krijuar hapësira që shfrytëzohen nga kriminelët.
Aktualisht ka rreth 10 000 fëmijë të humbur, që janë regjistruar si refugjatë, ndërsa Europoli ka nxjerrë lajmërime mbi grupe kriminale që shënjestrojnë fëmijët për shfrytëzim seksual ose për punë të detyruar në ferma dhe uzina.