AKZ vendos 6 kushte për bashkëpunim me “të gjitha partitë anti-qeveritare”

AKZ ka shperndare nje deklarate per shtyp ne te cilen thuhet: “Aleanca KuqeZi ka vendosur ti drejtohet në mënyrë trasparente të gjitha partive politike anti- qeveritare me prioritetin për bashkëpunim por të kushtëzuar në disa standarte morale, etike, ligjore dhe kombëtare për të cilat Aleanca KuqeZi është e vendosur të mos cedojë”

Kreshnik Spahiu tha se “në emër të Aleancës KuqeZi dhe mbështësve të saj i drejtohem të gjitha partive politike që kërkojnë bashkëpunimin me këtë levizje që kërkesat dhe standartet që kërkojmë të rivendosim kushtëzohen nga një pakt kombëtar politik dhe historik”.

Ky pakt sipas tij duhet të përmbaj:

1-      Rikonfigurim të të gjithë mekanizmit elektoral, duke përfshirë kapacitetet njerëzore dhe ekspertët e propozuar nga Aleanca KuqeZi në të gjitha nivelet e komisioneve zgjedhore. Duke filluar nga KQV, KZAZ, grupet e numërimit dhe deri në Komisionin Qëndror të Zgjedhjeve. Kjo është e vetmja garanci për të siguruar votën e lirë dhe të barabarte e të gjithë shqiptarëve.

2-      Marrëveshje politike dhe elektorale për hapjen e debatit mbi ndryshimin e sistemit zgjedhor dhe kodit elektoral, nga sistem propocional rajonal në sistem kombëtar ose të korrektuar.

3-      Marrëveshje politike për miratimin e një strategjie dhe platforme për heqjen e kufirit dhe doganave me dy shteteve shqiptare, Shqipëri – Kosovë, si dhe heqjen e cdo barriere tjetër që pengon unifikimin kombëtar.

4-      Marrëveshje politike për të standartizuar demokracinë parlamentare apo pushtetin qëndror dhe lokal nëpërmjet kufizimit të mandateve politike jo më shumë se dy mandate për çdo drejtues politik, kryeminister, kryetar partie, deputet, ministra, kryetar bashkie etj.

5-      Reformë Kushtetuese në sistemim e drejtsisë duke hequr të gjitha pengesat politike për dorëzimin, kallzimin, hetimin dhe ndëshkimin e çdo zyrtari të lartë politik duke filluar nga kryeministri aktual.

6-      Marrëveshje politike për ndarjen e tre pushteteve dhe pavarësinë e tyre duke filluar nga ndarja  parlamentit me qeverinë ku asnjë ministër të mos jetë deputet.

Aleanca KuqeZi i fton të gjitha partitë politike të spektrit opozitar që në këto orë që kanë mbetur të shqyrtojnë me gjakftohtësi këtë marrëveshje si një manifest i një ndryshimi historik për të ardhmen e mbi 10 milon shqiptarëve në rajon – thuhet me tej ne deklarate