Teuta, fitore mbijetese, Apolonia në Kategorinë e Parë

Teuta i falet një goli në minutat shtesë për të siguruar qëndrimin në Kategorinë Superiore në dëm të Apolonisë që u dorëzua pa kushte pas golit të shënuar nga Ardit Peposhi. 1-0 dhe “Djemtë e Detit” shkëputen në +4 nga Apolonia e cila së bashku me Elbasanin pret biletën për në Kategorinë e Parë. Ishte Apolonia që falë talentit të dyshes Fili-Uzuni mori më shumë iniciativën për të kërcënuar portën kundërshtare. Nuk kaluan veçse 4 minuta dhe Uzuni u gjend i vetëm përballë Rizvanit, por pesha e përgjegjësisë dhe mungesa e eksperiencës bëri që talenti fierak ta përplaste topin te Rizvani duke shpërdoruar rastin që mund t’i siguronte Apolonisë një gol të artë.

Vetëm pak sekonda më pas Kotobelli goditi nga e majta, por topi preku pjesën e jashtme të rrjetës. Në të 27-ën, Fili goditi fuqishëm por Rizvani u tregua sërish në lartësinë e duhur. 7 minuta nga fundi, Teuta tentoi sërish, por goditja e Çotës kaloi ngjitur me shtyllën e djathtë pingule të portës fierake. Me fillimin e pjesës së dytë, Teuta ndryshoi strategji duke u zhvendosur në gjysmëfushën e Apolonisë dhe sinjalin e parë e dha në minutën e 58 me Bruno Ditën që nga jashtë zonës nuk shënjestroi saktësisht portën. Minutat në vazhdim durrsakët kontrolluan lojën duke u treguar të kujdesshëm për të mos lejuar shumë hapësira. Gjithsesi, Apolonia tentoi në të 82-ën me Uzunin por goditja e tij ishte e parashikueshme për Rizvanin.

4 minuta nga fundi, Çota ishte shumë pranë golit, ndërsa pak sekonda më vonë i njëjti lojtar e stampoi topin në shtyllë me Peposhin që i vetëm në zonë nuk arriti të shtynte në rrjetë. 3 minuta më pas, Ardit Peposhi gaboi sërish një gol pothuajse të sigurt pasi portieri Miço i mohoi rrjetën. Goli ishte në ajër dhe Peposhi korrigjoi gabimet në minutën e tretë shtesë duke shtyrë në rrjetë topin që siguron matematikisht qëndrimin e Teutës në Kategorinë Superiore. Në krahun tjetër, Apolonia u dorëzua pas një 90 minutëshi ku tentoi gjithçka në “Niko Dovana” por nuk arriti të realizonte mrekullinë edhe pse kërcënoi seriozisht skuadrën durrsake vetëm dy javë nga fundi.