Tirana është kthyer te fitorja pas dy barazimeve e një humbje në tri ndeshjet e fundit, duke mundur Laçin në “Qemal Stafa”. Gola të shënuar nga Kahata e Morina, pothuajse në ekstremet e lojës, fiksuan shifrat 2-0 dhe tri pikë që përsëri e nxjerrin skuadrën bardheblu jashtë zonës së ftohtë, në pritje të përfundimit të ndeshjes midis Vllaznisë e Skënderbeut, që luhet sot në Shkodër. Vetëm dy pikë në tri javët e fundit bënë që Tirana të humbte terren në luftën për mbijetesë, ndaj fitorja dje ishte detyrim për lojtarët e Maganit. Ia arritën qëllimit, por me shumë vuajtje, sidomos në pjesën e dytë, kur Laçi u hodh i gjithi përpara në kërkim të golit të barazimit. Tirana shënoi në minutën e 13-të të ndeshjes, kur Kahata gjuajti me kokë pas krosimit nga këndi. Laçi barazon dhjetë minuta më pas, por në pozicion të parregullt. Bardheblutë janë të qetë në lojë, megjithatë nuk rrezikojnë shumë dhe dy rastet e tjera vijnë kryesisht për pakujdesi të mbrojtjes së Laçit. Fillimisht rrezikon Kahata, pastaj Ndikumana humb një rast të pastër. Laçi sulmin në pjesën e dytë, ndërsa vendasit preferojnë të mbrohen dhe të përgjigjen me kundërsulme. Portieri Lika shpëton portën nga një gjuajtje e Vucajt, ndërkohë që fitorja është e pasigurt për sa kohë që nuk shënohet goli i dytë. Ky moment vjen, tri minuta para përfundimit të kohës së rregullt, kur protagonist bëhet edhe një herë Morina, shënues edhe në derbi, i cili i dha qetësinë skuadrës së tij pas pasimit nga Ndikumana. Tani Tirana është përsëri sipër Vllaznisë në renditje dhe e barabartë me Flamurtarin, që sot ka ndeshjen kundër Partizanit. Laçi mbetet në vendin e katërt dhe aktualisht i ka kompromentuar shanset për zonën e Europa League.