Operacioni i koduar “Gracka” dokumenton mbi 9 vjedhje me dhunë dhe armë të kryera në Tiranë gjatë muajve tetor-nëntor të këtij viti. Komisariati nr. 2 njoftoi se ndaloi Leonard Doda, 23 vjeç, banues në Institut Bujqësor, Arsid Noka, 23 vjeç, banues në Mamurras, si dhe u bë shpallja në kërkim e Edison Ndreka, 22 vjeç, banues në Mamurras. Mësohet se aktiviteti ushtrohej në zonën e Liqenit Artificial, ku kanë ndodhur edhe shumë vjedhje me dhunë të parave dhe sendeve personale. Grabitjet kanë ndodhur më 9 dhe 14 tetor, si dhe në datat 7, 10, 12, 16, 18 dhe 19 nëntor, nën kërcënimin e armëve, duke u marrë kalimtarëve, shuma valute në euro, lekë, karta bankare, telefona celularë, portofolët, çantat dhe sende të tjera materiale, përfshirë edhe bizhuteritë e floririt. Policia tha se të dëmtuarit janë kryesisht vajza dhe gra të moshuara, që kalonin në zonën e Liqenit Artificial në Tiranë. Si prova janë sekuestruar maska, armë, bluza e doreza.