Trafik femrash e droge, pranga vëllait të kryebashkiakut të Roskovecit

Goditet organizata kriminale e trafikut ndërkombëtar të drogës dhe prostitucionit me veprimtari në 4 shtete. Mes 7 të arrestuarve në Shqipëri edhe vëllai i kryebashkiakut të Rroskovecit, Eugen Çaushi, i cili është akuzuar edhe për dhunë barbare në zgjedhjet e 23 qershorit ndaj kandidatit të FRD-së në Fier, Mit’hat Hoxha, ndërsa u lirua pas arrestimit më 12 qershorin e kaluar. Të ndaluarit e operacionit të koduar “Tempesta”, (Stuhia), janë dy nga Vlora, dy nga Fieri dhe 3 nga Tirana. Ndërkohë që mësohet se edhe në disa rajone të Italisë përgjatë një jave janë zhvilluar operacione për goditjen e këtij rrjeti, duke arrestuar të paktën 23 persona të tjerë. Pikërisht të premten e kaluar, kreu i Policisë së Shtetit, Artan Didi, firmosi një marrëveshje për operacione të përbashkëta në Romë me homologun Pansa.

Aksioni “Tempesta”

Operacioni është zhvilluar nga Policia e Shtetit, mbi bazën e një urdhri-arresti të ardhur në bllok për 7 të dyshuarit më datën 27 janar. Urdhri është përcjell nga Interpoli dhe Prokuroria për në polici dhe në fshehtësi të plotë është zhvilluar aksioni që zgjati 24 orë në tre qytete të vendit, aksi Vlorë-Fier-Tiranë. Mësohet se ka pasur edhe përpjekje për dekonspirim të këtij operacioni, pasi dy prej anëtarëve nuk u kapën në banesat e tyre, por në përpjekje për t’u arratisur. Këtij hetimi mësohet se i janë bashkuar autoritetet italiane, greke dhe rumune, që kishin objekt rekrutimin e vajzave të reja nga Lindja dhe më pas trafikimi në Itali për prostitucion, ose trafiku i drogës. Në pranga kanë rënë për qëllime ekstradimi, të dyshuarit Igli Metushi, 21 vjeç dhe Gazmir Shkurtaj, 27 vjeç, nga Vlora, që akuzohen për trafik droge marijuanë, Daniel Lika, 28 vjeç dhe Eduarto Hoxha, 37 vjeç, nga Fieri, për prostitucion dhe drogë. Kreshnik Bendo, 24 vjeç, Eugen Çaushi, 30 vjeç dhe Edër Dorzi, 32 vjeç, nga Tirana, për shfrytëzim prostitucioni. Banda vepronte si grup i organizuar kriminal.

Vëllai i kryebashkiakut 

Burime policore thanë se Eugen Çaushi është me origjinë nga Rroskoveci dhe i zhvendosur me banim në Tiranë. Ai është vëllai i kryebashkiakut të Rroskovecit, Gëzim Çaushi, i zgjedhur më 8 maj 2011, nën siglën e Partisë Demokratike. Emri i Eugen Çaushit del në skenë më 12 qershor të vitit të kaluar, gjatë fushatës elektorale për zgjedhjet e përgjithshme të 23 qershorit. Policia e arreston si të dyshuarin kryesor të dhunës barbare të ushtruar orët e vona të natës ndaj kandidatit për deputet të listës së Frymës së Re Demokratike për Fierin, Mit’hat Hoxha, 50 vjeç, i njohur edhe si biznesmen. I dëmtuari denoncoi se ishin tre vetë që e sulmuan dhe ai kishte njohur pikërisht Çaushin që dhe u arrestua, kurse sulmi u konsiderua politik. Policia mohoi që motivi të ishte politik, por nuk dha asnjë shkak për këtë ngjarje. Çaushi lirohet më vonë në rrethana të panjohura publikisht prej gjykatës, edhe pse akuza ishte plagosje e rëndë. Hoxha qëndroi për shumë ditë në spital me fraktura të rënda në trup dhe kokë.

Operacioni, 30 të arrestuar në katër vende, grupi i Milanos me femra, i Firences me drogë

Në kuadër të këtij operacioni, i cili është zhvilluar njëkohësisht në Shqipëri, Itali, Greqi dhe Rumani, mësohet se u bë i mundur ekzekutimi i urdhër arresteve për 30 persona, pjesë e 2 organizatave kriminale të lidhura me njëra-tjetrën, ajo e Milanos, e cila drejtonte prostitucionin e grave të reja nga Europa Lindore dhe ajo e Firences, e cila merrej me shpërndarjen e narkotikëve me origjinë nga Shqipëria në qendra të ndryshme të Italisë. Ky operacion është zhvilluar në kuadër të një hetimi të koordinuar nga Prokuroria e Milanos. Në kuadër të këtyre hetimeve u mundësua zbardhja e mekanizmit të veprimtarisë kriminale të zhvilluar nga këto dy grupe kriminale në kontrollin e aktivitetit të prostitucionit dhe në ripërdorimin e të ardhurave të përftuara në blerjen e narkotikëve, si dhe u identifikuan në Greqi dhe Shqipëri, përgjegjësit e dërgesave të narkotikëve. Të arrestuarit në Shqipëri do të ekstradohen dhe rrezikojnë nga 20-30 vite burgim.