Prokuroria e Krimeve të Rënda kërkon 20 vjet burg për Xhevahir Osja, i cili akuzohet për shfrytëzim prostitucioni për tre vajza të mitura në qytetin e Shkodrës.
Burime zyrtare të Prokurorisë bëjnë të ditur se Osja ka gjetur vajzat, i ka studiuar, i ka joshur me pretekstin e gjetjes së klientelës, u ka gjetur klientët dhe i ka marr paratë e përftuara nga ushtrimi i prostitucionit.
Bëhet fjalë për tre vajza, B. M, F.K, dhe G. B të cilat janë rekrutuar nga i pandehuri, me pretendimin se do i ndihmonte të gjenin mjete të përshtatshme jetese.
G.B, ka qënë banore e qytetit të Shkodrës në një banesë me qera dhe është njohur me Osjan në rrethana shoqërore. Kjo shtetase për shkak të marrëdhënieve jo të mira me familjen e saj është detyruar të largohet nga banesa e saj duke u strehuar me qera. Kjo shtetase ka ushtruar prostitucion për disa kohe me radhë ku fillimisht ka ushtruar prostitucion për të dënuarën Agime Likaj. Më pas e dëmtuara G.B është shkëputur nga e dënuara Agime Likaj dhe ka rënë në kontakt me të pandehurin Xhevahir Osja. Duke përfituar nga njohja e tyre e mëparëshme i pandehuri ka ditur gjendjen e të dëmtuarës si dhe punën me të cilën merrej ajo. Së bashku me G.B ka qënë dhe F.K, shtetase rome dhe B.M.
F. K rezulton të jetë e braktisur nga familja e saj dhe nuk ka patur një vend të saktë në të cilin të jetonte. Ajo ka qënë strehuar më parë tek Agime Likaj, vend nga i cili është larguar së bashku me G.B. Edhe e dëmtuara F.K. ka ushtruar prostitucion duke qënë e trafikuar nga shtetasja Agime Likaj. Ka qënë e dëmtuara G.B. personi që e ka njohur dhe e ka prezantuara të dëmtuarën F.K. me të pandehurin Osja.
Të dëmtuarat përfaqësojnë tre të mitura duke marrë parasysh të dhënat e gjendjes civile për moshën e tyre, ndaj Osja akuzohet për ‘Tarfikim të të miturve’.