Prokuroria për Krimet e Rënda Tiranë çon në pranga edhe 2 të dyshuar për trafikun e 2,36 tonë droge që u sekuestrua pak ditë më parë në Portin e Durrësit, me destinacion Italinë, njëri prej të cilëve organizator dhe tjetri ndihmës. Pas arrestimit të shoferit maqedonas Aco Nikolovski, si korrier i ngarkesës së madhe të fshehur mes 45 divanëve, dje u kap në Lushnjë edhe i kërkuari Petrit Manhasa, 43 vjeç, banues në Peqin, i dënuar më parë me 9 vjet burg për veprën penale të vrasjes. Nga hetimet e kryera rezulton se është organizator i trafikimit të ngarkesës së madhe të drogës dhe lokalizimi i tij u bë në një lokal në Lushnjë. Po dje u arrestua edhe një i dyshuar i tretë si pjesë e rrjetit, Burim Gjunkshi, 33 vjeç, banues në Dibër e Madhe Maqedoni, vend nga dyshohet se vinte edhe lënda narkotike. Prokuroria deklaroi se po vijon hetimet për zbërthimin e të gjithë linjës së trafikut dhe pjesëtarëve të grupit.
Trafiku i 2,36 tonëve hashash drejt Italisë, pranga organizatorit Manhasa dhe ndihmësit Gjunkshi
