Automjetet që do të përdoren për transportin ndërqyetas (ndërmjet Tiranës dhe qyteteve të tjera të vendit), duhet të përmbushin një sërë kushtesh sa i takon komoditetit të lëvizjes. Në një projektvendim të planifikuar për t’u miratuar në mbledhjen e Këshillit Bashkiak janë përcaktuar standardet minimale që duhet të plotësojnë linjat e urbanit për transportin e qytetarëve. Projektvendimi për :“Përcaktimin e standardeve minimale të detyrueshme, në linja të rregullta udhëtarësh ndërqytetëse”, citohet se të gjitha linjat e transportit të Tiranës dhe rretheve duhet të sigurojnë një sërë kriteresh mbi standardet minimale të detyrueshme, të cilat do të zbatohen nga të gjithë operatorët që kërkojnë të licencohen në linja të reja, të rilicencohen në linjat ekzistuese, apo kërkojnë ndryshim apo shtim mjetesh. Kështu automjetet (autobuzët) duhet të jenë të gjithë të vitit të prodhimit 1995, kapaciteti minimal transportues jo më pak se 14 vende ulur, për të gjitha mjetet (autobusët). Numri i mjeteve dhe drejtuesve të tyre është i përcaktuar, si dhe kushtet e komoditetit për të gjitha mjetet duhet të plotësojnë 100 për qind të mjeteve të inventarit, e që duhet të jenë të pajisura me aspirim. Estetika e brendshme (lidhur me vendet e pasagjerëve, dritaret, dyshemetë e mjeteve etj), që konsistojnë në drejtim të një paraqitjeje dhe mirëmbajtjeje sa më të pranueshme, e cila respekton në këtë mënyrë kërkesat e komunitetit për një shërbim të një cilësie të lartë, do të jenë të detyrueshme për të gjitha mjetet. Estetika e jashtme e të gjitha mjeteve do të jetë e tillë që të plotësojë rregullat në zbatim të Kodit Rrugor, lidhur me vendosjen mbi mjetet e transportit të shkrimeve a shenjave reklamuese të shndritshme ose reflektuese, me qëllim që të përjashtohet çdo rrezik verbimi a hutimi për drejtuesit e mjeteve të tjera, si dhe njëkohësisht të pengojë çdo formë reklamimi që ka një përmbajtje, domethënie apo synim të kundërt me normat e këtij Kodi. Në një tjetër projektvendim që prite të miratohet përcaktohet se : “Linjat e transportit rreth qytetas automjetet duhet t’i kenë të vitit të prodhimit të 1998-s, si vit dysheme për të gjitha mjetet (autobusët).Kapaciteti minimal transportues jo më pak se 40 vende për të gjitha mjetet që vë në përdorim të qytetarëve”.