Një grup operatorësh turistikë nga Turqia po zhvillojnë në Shqipëri një tur duke u njohur më nga afër me potencialet që ofron vendi ynë.
Nën kujdesin e Agjencisë Kombëtare të Turizmit operatorët turq u takuan me operatorë turistikë shqiptarë me të cilët shkëmbyen informacione lidhur me historinë dhe vendet që mund të përbëjnë interes për t’u vizituar nga turistët turq.
Sipas të dhënave të Shoqatës Turke ‘Tursab’, gjatë një viti, Ballkani vizitohet nga 1 milion turistë turq të cilët vlerësohen si potencial edhe për të vizituar vendin tonë.
Përfaqësues të delegacioni turk deklaruan gjatë takimit se turistët turq janë të interesuar të vijnë të eksplorojnë Shqipërinë, duke vlerësuar resurset e mëdha natyrore dhe kulturore të vendit tonë.
Gjatë qëndrimit dy-ditor në vendin tonë, delegacioni turk do të vizitojë disa nga atraksionet më të rëndësishme historike dhe monumentet e kulturës, përmes tureve njohëse dhe informuese të përgatitura nga Agjencia Kombëtare e Turizmit.