Mësuesit në të gjithë vendin do të duhet të përgatiten për t’iu nënshtruar testimit.
Ministria e Arsimit bën të ditur se në 18 prill 3500 mësues do futen në testimet e kualifikimit. Rezultatet e këtij testimi do të jenë një konfirmim për rritjen e pagës së tyre. I hartuar nga grupe specialistësh të Institutit të Zhvillimit të Arsimit, testimi do të realizohet sipas profileve që kanë mësuesit. Do të jetë i ndarë në dy pjesë: Fillimisht arsimtarët duhet t’i përgjigjen pyetjeve për programin lëndor, mësimdhënien, etikën dhe drejtshkrimin që përmban 30 pikë ndërsa në pjesën e dytë pyetjet i referohen përmbajtjes shkencore të lëndës vlerësuar me 40 pikë. Me 30 pikë vlerësohet nga portofoli i mësuesit që ka çdo kandidat që hyn në testim nisur nga kurrikulumi, përvoja, njohuritë e gjuhës së huaj.
Udhëzimi i Ministrisë së Arsimit thotë se kush ka të paktën 5 vjet punë futet në testim për kualifikim “mësues i kualifikuar” kush ka te paktën 10 vjet për “mësues specialist” dhe kush ka te paktën 20 vjet për “mësues mjeshtër”. N ë muajin maj mësuesit do t’i nënshtrohen provimit të përgjithshëm që sipas Ministrisë së Arsimit do të jetë një instrument matje së nevojave që kanë mësuesit.