Administratori i koncesionarit të Rrugës së Kombit dënohet në Itali

Nicola Spadavecchia, administratori i shoqërisë që zbaton koncesionin e Rrugës së Kombit, u dënua sot me 6 vjet burg nga Gjykata e Avenilos në Itali.

Zoti Spadavecchia u shpall fajtor për “shpërdorim detyre”, pasi gjatë kohës që ka punuar si inxhinier për kompaninë Autostrade per Italia, nuk ka kryer kontrollet dhe mirëmbajtjen e nevojshme të urës Acqualonga, urë në të cilën humbën jetën 40 besimtarëve në vitin 2013, të cilët udhëtonin në një autobus që doli nga ura për shkak të mbrojtësve të dëmtuara.

Nicola Spadavecchia u emërua administrator i vetëm i shoqërisë së krijuar nga konsorciumi Kastrati-Salillari, Albanian Highway Concession shpk, në fund të tetorit 2017, edhe pse ishte 67 vjeç, i dalë në pension dhe nën hetim për aksidentin tragjik.

Ende dhe sot, z.Spadavecchia vazhdon të jetë administrator. Mandati i tij përfundon në vitin 2022.

Aksidenti për të cilën u dënua Nicola Spadavecchia

Më 28 korrik 2013, një autobus me pelegrinë që ktheheshin nga vendi i shenjtë i Padre Pios,ra në humnerë duke marrë me vete 14 bordura anësore të sigurisë, të bëra me çimento të tipit “New Jersey” (si ato të autostradës Tiranë-Durrës).

Sipas ekspertizës gjyqësore nuk ishin kontrolluar dhe mirëmbajtur siç duhej dhe si pasojë ato nuk siguruan mbrojtjen e nevojshme për të ndaluar daljen e autobusit nga ura.

Në atë aksident humbën jetën 40 persona, që shokuan dhe prekën gjithë Italinë.

Hetimi i mëpasshëm i Autoritetit Kombëtar Antikorrupsion të Italisë, i drejtuar nga gjykatësi antikorrupsion Raffaele Cantone, arriti në konkluzionin se në vitin 2009, në një tender të rëndësishëm për rindërtimin e barrierave anësore në atë pjesë të autostradës, e cila administrohej nga Spadavecchia, nuk u përfshi zëvendësimi i barrierave të vjetra, të cilat as nuk ishin kontrolluar, pavarësisht se ishin të gërryera në pjesën e lidhjes me asfaltin.

Gjykata arriti në përfundimin se, pavarësisht se shkaku i aksidentit ishte defekti i autobusit, barrierat e pamirëmbajtura ishin faktor vendimtar në tragjedi. Për këtë arsye, gjykata ka dënuar administratorin e kompanisë që duhet të bënte mirëmbajtjen – raporton portali Exit.

v.l/ Dita