Vdekja në tunelin e HEC-it, makinisti: Përgjegjëse firma!

Mungesa e kushteve teknike në punë dhe trajtimi pa siguri që firmat iu bëjnë punonjësve ka sjellë një tragjedi të vërtet në Mirditë, ku ditë më parë humbën jetën tre punonjës.Policia e Lezhës vijon hetimet mbi ngjarjen e rëndë në tunelin e HEC-it të Qafë Mollës, në Mirditë, ku 3 shtetas, dy shqiptarë dhe një turk, humbën jetën në rreth 2000 metra thellësi. Viktimat; Ndue Legisi, rreth 50 vjeç, Pjetër Doda, rreth 38 vjeç, dhe një punëtor turk me emrin Hasan; po punonin për të vendosur lëndën shpërthyese, për të vijuar më tutje punën në njërin nga tunelet, kur një masiv dheu është shkëputur, fillimisht duke zënë poshtë njërin nga viktimat, ndërsa dy personat e tjerë shkuan për të shpëtuar kolegun, kur është shkëputur dhe një tjetër masë dheu, duke shkaktuar edhe tragjedinë.

Dëshmia e makinistit

Është dashur tragjedia që njeri prej punonjësve të HEC-it të hedhë dritë mbi errësirën e asaj që ndodh në galeritë 1600 m.  Denoncimin e ka bërë para mediave, një prej punonjësve të këtij HEC-i, vetëm pak minuta pasi ndodhi tragjedia e tre kolegëve të tij, në mjediset e HEC-it, denoncimin i shoqëruar me akuzën për përfaqësuesit e shtetit shqiptar që nuk kanë shkelur në këtë vend për të kontrolluar kushtet e punës, sigurinë, kontratat e punës. “Ngjarja ka ndodhur pasi kam dorëzuar turnin në orën 7, kanë ardhur shokët e mi për të bërë plasjen, kanë hyrë brenda për këtë, por një sasi dheu nga mali është shkëputur. Si rregull ne e kemi t’i bëjmë me harqe, por kjo firmë, të cilës nuk dua t’i përmend emrin se është një firmë banale, nuk bëri punën që duhej të bënte. Faji është i gjithi i inxhinierit dhe atij përfaqësuesit të firmës”, shprehet makinisti i HEC-it. Për ndërtimin e HEC-it të Qafë Mollës punojnë afro 3000 punonjës, kryesisht nga Mirdita, Puka dhe Kukësi, ndërsa nuk kanë munguar gjatë gjithë këtyre kohëve protestat e banorëve të Mirditës për shpronësime dhe kushte të vështira të punës. Punimet për ndërtimin e këtij hidrocentrali kishin nisur gati dy vjet më parë. Banorët e zonës kanë protestuar disa herë, jo vetëm për kompensimin e tokave. Hidrocentrali ishte dhënë me koncesion nga qeveria e mëparshme, por ndërtimi i tij ka hasur kundërshtinë e banorëve të zonës.